كتبت شيماء شوقي
كل واحد في المجتمع عليه دور والأزمات والكوارث توضح أننا مينفعش نستغنى عن بعض واحنا كلنا مع بعض في مركب واحدة فلازم نتقي الله في بعض
عزيزتي الأم الفاضلة أنت عمود البيت عليك الاهتمام بنظافة منزلك بنفسك ياريت في هذه الفترة تستغني عن أي حد بيساعدك لأنه أكيد بيختلط بأفراد كتير وأحنا محتاجين نقلل من انتشار الفيروس فيا ريت الأسرة كلها تتعاون في تنظيف المنزل،كذلك أيضا الإكثار من شرب المياه والسوائل الدافئة والمأكولات الطازجة والخضروات حتى نرفع المناعة داخل الجسم
الأب لو بتروح تقعد على القهوة بلاش الشيشة والنفس والتجمعات اليومين دول علشان هترجع بيتك حامل للفيروس وتديه لأولادك حرام عليك هما ليس لهم ذنب وطبعا بلاش ننتهزها فرصة وتقول هشربها في البيت لأن ده خطر عليهم كبير تعالى على نفسك شوية الكرونا قنبلة موقوته لابد من التعامل بحذر حتى لا تنفجر في وجوهنا جميعا
بالنسبة للأولاد طبعا لأنهم هيجننونا في الإجازة عادي جدا هنطول بالنا شوية وهنشحن كل التليفونات والتابات والألعاب والمكعبات والسلم والتعبان وبنك الحظ هههههه وعليهم كل الألعاب طبعا ضغطك هيعلى عادي جدا كركديه وظبطي الدنيا
من فضلك نحن نحتاج أن نقف جنب بلادنا بجد مفيش داعي ابدا اننا نشتري بكثرة ونركن عندنا في البيت ونرجع نقول الحاجة سعرها بيزيد ليه ، ياريت نمشي زي ماحنا ماشين علشان نتجنب مشاكل اقتصادية كفاية غلو الأسعار اللي أحنا فيه
ياريت بجد السادة التجار لا يستغلوا الظروف في تحقيق مكاسب اقتصادية لأن بجد هيخليك تاجر خاين ، الناس اللي بدأت تعلي اسعار المنظفات والكمامات والسبرتو انت بتمص دم شعبك اللي هو مش ناقص إلا من رحمه ربه طبعا
كذلك ايضا لازم نهتم بالنظافة الشخصية والحرص في التعامل لينا وبين أي فرد سواء داخل الأسرة أو خارجها لازم الحذر علشان احنا في مركب واحدة متنساش الجملة ديه المياه والصابون في كل مكان فيه غسولات سائلة أيضا أيهما متاح بالنسبة لك ، نحترس من المواصلات العامة منديلك في إيدك إيدك وعلى فمك لو مش متاح كمامة
ربنا يعافينا ويعافي أولادنا وكل أحبائنا في كل مكان واجه الكرونا وميهمكش
