1- مش لازم علشان أكون قارئ وفاهم وعميق وكده أتحول لشخص بيسب الدين وبيبيح لنفسه يشتم في الطالعة والنازلة ده ملهوش علاقة بالقراءة ده له علاقة بشخصيتك.
2– كون إن حضرتك بتقرأ فى الفلسفة مش معناه إنك مميز وبتفهم وعبقري زمانك القراءة هواية جميلة بس مش نهاية الكون زيها زي الرسم والكتابة ومش علشان بتقرأ فلسفة يبقي أنت مؤهل إنك تحكم علي رجال الدين كون إن أهلك حفظوك مش فهموك الدين يبقي شئ يرجع لأهلك مش لرجال الدين وحتى لو رجال الدين هما السبب ومقدروش يردوا عليك نتيجة ضعف محتواهم العلمي فالدين برئ من أى عاتق يتحمل عليه مش هتبقي كول وبرنس لم تدخل تسب وتشتم فيهم علشان تواكب عصر الحداثة الجميل إل إنت منبهر بية إنت ومجتمعك.
3-مش لازم علشان أكون قارئ أبين نفسي إني عميق وأكون مكتئب والدنيا سوداء من كل ناحية وتقعد تقول العالم يحترق وتشوف مساوئ مجتمعك بس وتعيشها بسوداوية ده ملهوش علاقة بالقراءة إحنا بنقرأ في الأصل علشان نتعلم نعيش الواقع بقيم ومبادئ صح معاك إنك لم بتقرأ الواقع بيظهر مساوئة أكتر لكن حضرتك بتتعلم وتقرأ علشان تقدر تغير ده وتبقي عقلية ناضجة ومستوعبة أكتر إزاى تتعامل مع الحياة وتفهم إل قبلك عاشوا إزاى ولستخدموا أدوات إيه علشان يقدروا يتغلبوا على ده.
4-مش من حقك ولا من حقي ولا من حق أى حد أدخل أسب الناس ال بعدت عن الدين أو أى ديانه تانية أو أى مذهب كل واحد حر طالما لم يضر ولم يستبيح دم اتعاملوا بإنسانية عامة لإنو مهما كان مذهبك أو ديانتك أو فلسفتك فميش واحدة منهم بتدعوك إنك تروح تسب حد وتتهمه بضعف أفكاره لم انتو الإتنين تتفقوا على نقاش في موضوع معين بأسلوب حضاري والطرفين قابلين ساعتها ده أسميها مناقشة أو مناظرة عادلة.
٥-متعطيش لنفسك الحق تدخل تفرد عضلاتك على أى حد مهما كان مين هو سواء شخص عادى أو شخصية قارئة علشان الطائفة دى إسمها باحثة عن الحقيقة والجمال إما بيقرأ علشان يلاقي سعادته أو بيقرأ علشان يفهم سبب وجوده فمتجيش إنت تعمل نفسك فتوة وتحاول تثبت له إنك بتفهم وإنك إل على حق ولو انت عارف إن جوانبه ضعيفة في الدين ومهزوزة متستغلش نقاط الضعف دى وتسخر من الثوابت الصغيرة إل في حياته لإنك ممكن توصله لدرجة الانتحار ؛ اتعاملوا بحضارة مش بهمجية.
6-اقرأ الكتاب إل تحبه للقارئ إل بتحبه مش لازم يكون في البست سيلر ( الأكثر مبيعًا و رواجًا) ومش لازم يكون في مهرجان واتفرج على الفيلم إل يريحك وتحبه حتى لو مفهوش أى إبداع ، اسمع مزيكا بتحبها حتى لو مش أحلى حاجة كفاية إنك بتحبها اضحك واخرج واستمتع بحياتك، القراءة جزء من حياتك مش كل الحياة دور علي حلمك واتعلم منها خليها جانب الراحة بتاعك وسعادتك بعد يوم طويل من الإجهاد مش لازم يبقي ليك قالب علشان تثبت إنك مثقف بالعكس إنت إل بتخلق القالب بتاعك حتى لو إنت شخص تافه ومبهج وبتحب المزيكا الصاخبة وبتشرب نعناع في النهاية إنت عملت إل إنت بتحبه مش ال فرضة عليك عالم الثقافة المزيف إل زود إكتئاب ناس كتير ودمرهم .
