كتبت: ثريا الصاوي
استضافت الإعلامية منى الشاذلي مساء أمس نجم الجيل تامر حسني في برنامج “معكم” المذاع على cbc احتفالاً بليلة رأس السنة الميلادية 2022.
قال تامر حسني خلال الحلقة: “مبدأ حفلاتي هو إني طالع بفرح الجمهور مش غنا بس، وعايز أبهر وأفرح الجمهور ولما حد من برا مصر يشوف الحفلات عندنا بيحصل فيها إيه يقول إنه شبه اللي عندنا وللأمانة هو مكلف ولكن التكاليف الكتير اللي على المسرح بحاول يبقى فيها ابتكار مش مجرد تكاليف على الفاضي”.
وتابع: “أنا بشتغل عشان الجمهور وأعبر عنهم، وكنت عايز أبقى فنان شامل وكل جزء أنا دخلته عملت فيه حاجة ناجحة تضيف لتاريخي أنا بكتب وبلحن لنفسي، 90% من أفلامي كنت أنا المؤلف”.
وكشف الفنان تامر حسني عن كواليس تسجيل ألبوم بنت الإيه والذي حقق به نجاحًا باهرًا.
وأكمل: “ألبوم بنت الإيه مكنش هيبقى اسمه كده وكان هيبقى اسمها مكنتش مبين، ولكن في راجل دون ذكر اسمه سرق الألبوم كان شغال عند نصر محروس، وكان خاطب وحب يفرح خطيبته وبيبعتلها كل يوم أغنية يمسي بيها عليها لحد ما هي فرحت ومسّت على أصحابها في الجامعة”.
وأضاف حسني: “وطبعًا زعلت وكنا في حالة حزن مش طبيعي لأن الألبوم اتضرب ونزل وبقاله أسبوع ببلاش مع الناس في السوق، فروحت لأستاذ نصر محروس وقولتله اديني فرصة أدخل اعمل أغنية جديدة وجايز تنجح قبل طرح الألبوم بيوم، ودخلت الاستوديو لمهندس الصوت أمير محروس، وقعدت معاه نشتغل على أغنية يا بنت الإيه ومكنش ساعتها فيه كلمات حتى وكانت معظم كلماتها حشو، وطلعت حلوة في الآخر”.
كشف النجم تامر حسني: “قلدت صوت الفنانة سوسن بدر في لقطة صغيرة، وعندما وجدت أن الصوت مشابه قمت بإذاعة هذا الصوت”، مضيفًا: “إذا لم يكن صوتي مشابهًا لاستعنت بصوت مشابه للفنانة سوسن بدر”.
وكشف الفنان تامر حسني مفاجأة أخرى حول أغنية “هو أنت تاني.. راجعلي ليه” الدويتو الذي جمعه بالمطرب بهاء سلطان.
وأضاف: “كنا خارجين من رحلة أغنية “قوم اقف وانت بتكلمني” كنت متفق مع نصر محروس هسمعه أغنية دويتو مع بهاء سلطان، وقتها بهاء سلطان راحت عليه نومة ولم يأت الإستوديو فقلدت صوته وسجلتها كلها لوحدي”.
وتابع: “لما روحت لنصر محروس أسمعه الأغنية ففضل ساكت في الحتة بتاعتي وأول لما جت الحتة بتاعت بهاء سلطان قام قال “معلم بص دخل إزاي” قولت له معلم مين ده أنا اللي معلم، وأنا اللي دخلت وده مش بهاء أصلًا فقاللى أنت هتستعبط ولا إيه، وفي الحقيقة أن الأغنية اتسربت وإحنا مكناش هننزلها، ولما نزلت بهاء سلطان كلمني وقاللي الأغنية دي بقت تتطلب مني وأنا مش حافظها ولا عارفها فقلت غنيها”.
وأكد أنه يسعى لتطوير نفسه منذ دخوله المجال الفني ولا يخجل من الاعتراف بذلك، ويتجنب ما قد يغضب الجمهور منه، ويراجع نفسه باستمرار.
