عايزه أتجوز.
بريد القراء أعداد: هويدا صابر
الجواز قسمه ونصيب ، ونصيبك هتشوفه في الوقت أللي كاتبه رب العباد ، دا مكتوب علي أسمك من قبل متتولد ، تروح يمين تروح شمال تخرج هنا وهناك أو دا يجي يخبط علي الباب ويمشي ودا موضوعه ميكملش ، عشان بردوا في أخر هتاخد نصيبك.
دي مشكلة ج م:
مشكلتي أن كل ميتقدملي عريس الموضوع ميكملش ، يعني يدخل البيت ويكون مبسوط جدا هو وأهله ونتفق وبعد ميخرجوا يقولوا كل شئ قسمه ونصيب ، ودا مش مره ولا مرتين لا دا كتير ، أو ميحصلش قبول منه ، أو أبويه يرفض العريس رغم أني بكون موافقه عليه ، أو نوصل أننا نكون نازلين نجيب الشبكه أو الدبل تحصل مشكله بينا الجوازه تتفركش ، وانا بصراحه نفسيا تعبت جدا ومعنديش أمل أني ممكن اتجوز في يوم من الأيام ، وفي ناس بتقولي أظهري وأخرجي عشان العرسان تشوفك ، هو أنا المفروض أعمل ايه عشان أتجوز؟
—————————-
السائلة الكريمة: أنتي معندكيش مشكله خالص ، الموضوع بسيط جدا أنتي لسه نصيبك مجاش ، في بنات كتير جدااااا مرت بكل دا وفي الأخر أتوفقت مع أنسان بوصفهم أنه هديه من ربنا وندموا علي كل لحظه كانوا فيها بيبكوا علي العريس أللي راح أو الحبيب أللي غدر وباع وبيقولوا الحمدلله أن المواضيع دي متمتش ، وبكلامهم أن الأنسان دا ظهر فجأه بدون أي مقدمات ولا تخطيطات ولا ترتيبات ، خلاص ربنا أراد في الوقت المناسب أنه يظهر ويعوضهم ، ربنا كريم ومبينساش حد ، ورزقك جايلك جايلك ، لا تضايقي نفسك ولا تتعبي ، أصبري وأدعي ربنا يقربك من نصيبك ، ولحد ميجي أن شاء الله ، أهتمي بنفسك ومظهرك وصحتك ألعبي رياضه وأشتغلي ، حاولي تشغلي وقتك وتفكيرك ، ومتنسيش ربنا أبوابه مفتوحه 24 ساعه سامعنا وهيستجيب محدش هييسر أمر غيره لأنه خير ومحدش هيمنع أمر غيره لأن فيه شر أحنا منعلموش ، احنا بس أللي بنكون مستعجلين ، وربنا ييسرلك أنسان احسن مبتتمني ويكون فيه الخير ومعاه السعاده أنتي وكل البنات يااااااارب.
