اصحابي كتير بيسألوني مش فاهمين حالتي المرضية
اقولكم انا اول مرة جالي سرطان ثدي كان في 2010 وكان مش نوع النشط وفضلت 3 سنين متعافية وكويسه وفي سنة 2014 رجع تاني سرطان ثدي بس نوعه نشط وانتشر بالعضم والرئة واخدت علاج وانتصرت علي المرض بفضل الله وفضل بس حاجات بسيطة في العضم ووقتها الدكتور قالي ماليش علاج هرموني اقراص علاجي هيرسبتن علي نفقة الدولة
وطبعا الدولة بترفض تصرف الهيرسبتن الا لحالات سرطان ثدي اول مرة وال يجيلها تاني مرة تموت المهم فضلت من غير علاج ومن شهر واحد ال فات ابتدي الدم والصفايح عندي يقعوا وفضلت انقل دم وصفايح والدكتور طلب عينة نخاع اول مرة طلع مفيش حاجة في النخاع طلب عينة تانية اكبر وبنج كلي يعني زي عملية صغيرة عملتها طلع ان المرض وصل للنخاع بس الحمد لله مش كتير الخلايا يعني ان شاء الله نسيطر عليه لحد هنا الدنيا تمام والدكتور وانا مركزين في موضوع الدم والصفايح ومش بنفكر في حاجة تانية وقتها انا كنت بحس بالم في العضم بس كنت اخد مسكن وخلاص لحد ما في يوم الالم ده خلاني اصرخ وكان فوق احتمالى والمسكنات مش مأثرة فيه روحت للدكتور وحجزوني ودي كانت اول مرة اتحجز وعشان يعرف من ايه الالم وعملوا مسح ذري علي الجسم لقينا ان المرض انتشر بالعضم وهو ده ال مسبب لي الالم بس الحمد لله عايشه علي المسكنات وباخد اقراص كيماوي بديلة الهيرسبتن
ال لو الدولة صرفته ما كانش حالتي ساءت كده وعشان في ناس مش مصدقة موضوع رفض الدولة لعلاجنا ان شاء الله بعد 15 يوم حاستلم الرد علي الورق وحاصور الورق ده وانشره علي صفحتي ولو جات موافقة يبقي ياريت ربنا كريم
المهم شرحت لكم كل حاجة واحب اقولكم
ان راضية بالمرض ده ابتلاء وان الله اذا احب عبدا ابتلاه حد يطول حب ربنا ليه
وتاني حاجة انا بفضل الله وبفضل وجودكم جمبي
قوية وحانتصر علي المرض للمرة التالتة
الموضوع كله حب من ربنا وابتلاء ورضا مني
#حب ابتلاء رضا
