صورة أرشيفية
هي ” انا تعبت بقى مش كل حاجة مامتك تدخل فيها “
هو “متنسيش انك بتتكلمي عن امي “
هي ” يا سيدي علي عيني و على راسي بس مش للدرجة دي “
هو ” هي عملت ايه يعني ؟ كل ده عشان عاوزانا نعيش كويس ؟ “
هي ” هي مش عاوزانا نعيش كويس هي عاوزانا نعيش زي ما هي عاشت “
هو ” هي اكبر مننا و خبراتها اكيد اكثر ، هي صح “
هي ” لا مش صح لازم تفهم ان دي حياتنا احنا مش حياتها هي و احنا اللي نمَشي حياتنا بالطريقة اللي احنا شايفنها مش اللي هي شايفاها “
هو ” هي عملت ايه بس ؟ “
هي ” عملت ايه ؟ قول ماعملتش ايه دي من ساعة ما بتصحى من النوم تفضل تتصل بيا [ ايه ده انتي لسه نايمة ؟ لا قومي كدة و فوقي عشان تنضفي الشقة ، قولي لي صحيح انتي طابخة ايه النهاردة ؟ لا لا لا اوعي تعملي الاكلة دي ابني مش بيحبها ، اعملي كذا و كذا بس متعمليهوش بطريقتك عشان الاكل بيطلع ماسخ ، اعملية بالطريقة الفلانية عشان هو بيحبه كدة ، هو انتي كنتي بتزعقي لابنك ليه ؟ لا لا حبيب تيته محدش يزعقله ، و بعدين بنتك ازاي تفضل برة كل ده ؟ الناس تقول ايه ؟ دي بنت و مينفعش كدة متديهاش الثقة كاملة ، و بعدين انتي بقالك 17 سنة متجوزة و لسه فاشلة في تربية عيالك ؟ ] يا راجل دي كرهتني في نفسي حسستني اني مبعرفش اعمل اي حاجة “
هو ” انتي عاوزني يعني اقول لأمي ملكيش دعوة بحياتنا ؟ “
هي ” انا مقولتش تقول لها كدة بس بلاش موقفك السلبي دي ، على الاقل لما تغلط فيا دافع عني ، فهمها ان احنا شقتنا على طول نضيفة ، فهمها ان الاكل اللي مكنتش بتحبة بقيت اعمله بطريقة عجبتك ، فهمها اني لما بزعق لابني بيكون عشان مصلحته و عشان شقي ، فهمها ان بنتنا متربية كويس و احنا واثقين فيها و انها مبتخبيش عني حاجة و متفوقة في دراستها ، فهمها اني زوجة و ام شاطرة ، فهمها ان بيتنا ناجح “
هو ” ربنا يسهل يا حبيبتي سلام بقى عشان عندي شغل ، اه و ابقي اسألي ماما على طريقة عمل السمك عشان هي عارفة انا بحبه ازاي “
هي ” هتفضل طول عمرك سلبي
