بقلم/( شرين سعد أحمد
شاعرة جنوب الوادي
************
أحبك شمس بتدفي
أحبك لقمة بتكفي
وأحبك لمة وسط الزرع
أحبك وعد بيوفي
،،،،،،،،،،،،،،،،،،،
أحبك مش كلام ده سكات
أحبك ف أصعب الأوقات
أحبك قد عرض الأرض
ترابك والله ما يتفات
،،،،،،،،،،،،،،،،
انا يا بلدي بهواكي
ودايب دوب في هواكي
ولا زيك ملك قلبي
وعايش عمري في حماكي
،،،،،،،،،،،،،،،،،،،
أحبك فخر بحضارة
أحبك زفة في حارة
وأحب ربابة بتواسي
في جوف الليل يانوارة
،،،،،،،،،،،،،،،،،،،،،،
صبغت كفوفي بترابك
أنا زنهار على اعتابك
فداكي دمي يابلدي
ولا يمس الخسيس بابك
،،،،،،،،،،،،،،،،،،،،،
أحبك مش هخبييها
ولا ف جوفي هداريها
هقولها بعلو صوتي وأعيد
دي زوادي هعيش بيها
،،،،،،،،،،،،،،،،،،،،،،
أحبك مهما داسوني
ورفضوا يوم يواسوني
وقالوا عني مش ابنك
في لوحة شر رسموني
،،،،،،،،،،،،،،،،،،،،،،
ومهما سافرت براكي
أنا بيكي أنا معاكي
وهرجع لجل ما أصلي
في محرابك وجواكي
،،،،،،،،،،،،،،،،،،،،
أحبك صوت أذان رمضان
وطفل بيحفظ القرآن
عجوز بيصلي ع الكرسي
وقلبه معمره الإيمان
،،،،،،،،،،،،،،،،،،،،
أحبك وقت سلم وحرب
أحبك لو يزيد الكرب
أحبك شط نيل وقنال
وفيكي دقت شهد الحب
،،،،،،،،،،،،،،،،،،،،،
بحبك يا بلادي كتير
أحبك حتى في أمشير
ومهما تهزني عواصفه
يدق القلب ليكي أسير
،،،،،،،،،،،،،،،،،،،
7/11/2018
