حوار/ غادة عبدالله
أول رسمة عملتها على الهدوم كانت صدقة.
رضا العملاء وسعادتهم أهم من الفلوس وده بيديني سعاده أكبر لأن أنا فنانه مش تاجرة.
طموحي أن فنى والبراند بتاعي يوصل للعالمية.
مش شرط يكون غلاء الأسعار هي الحاجه اللي تخليكي تجددي وتعيدي تدويرالأشياء.
أنا مبندمش حتي لو أخطأت بحاول أتجه لتصحيح الخطأ لو قدرت.
بناتي فخورين بيا وبفني ونفسهم يبقوا زيي ودي أكثر حاجة بتسعدني.
احتراف الفنانة التشكيلية” نيفين كامل” الرسم وحب التعبير بريشتها وألوانها، وتحويلها للواقع بإبداعات فنية لم يكن موهبة فقط بقدر ما سعت إليه نيفين كمهنة ونافذة للانطلاق مبادرتها “شقلبي دولابك”، والتى نالت اعجاب وتفاعل الكثير من الناس معها على مواقع السوشيال ميديا، فهى فنانة ترسم ما يميزها وتدمج الألوان وتمزجها مع مزيح الحياة لتصبح لوحة فنية تبهر الانظار، وهو ما يجعل أعمالها قريبة من المتلقي بعيدة عن التعقيد.
فاليوم كان لــ مجلة سحر الحياة حوارمعها، لنرصد لكم متابعينا صورة جميلة لنجاح المرأة والفنانة “نيفين كامل” ونطلع على مسيرتها المهنية بين هوايتها للفن، وأعادة تدوير الملابس والأحذية، وما هدف وفكرة مبادرتها “شقلبي دولابك” وسر نجاحها المتميز، وما هو طموحها للمستقبل .
بداية حدثينا عن نفسك فى سطور بسيطة…من هى نفين كامل؟ وما علاقتك بفن الرسم والألوان ؟
نيفين كامل…عمرى 29 سنة، من الزقازيق الشرقية، خريجة كلية تجارة، زوجة وأم لــثلاث بنات.
علاقتي بالرسم والألوان.. مجرد موهبة عندي من الطفولة.
كلمينا عن مبادرتك “شقلبي دولابك” والتى نالت وحققت نجاح كبير وتفاعل بين الناس.. كيف جاءت لك فكرتها وما الهدف منها ؟؟ وكيف قومتى بالتنفيذ؟
مبادرة “شقلبي دولابك”…بداية فكرتها كانت عن طريق عرض بعض من صور، ونماذج شغلي على “السوشيال ميديا” سواء رسم، اوأعادة تدوير، وجدت أقبال كثير من الناس بيبعتولي نفسهم يتعلموا الشغل اللي انا بعمله، ولأن أنا مكانش عندي، وقت إني أدي كورسات وقتها عشان أطفالي.
فقررت أعمل “إيفنت على الفيس بوك ” وسميته “مبادرة شقلبي دولابك”، وكنت بنزل فيه المقالات المصورة والفيديوهات التعليميه اللي بعملها وبعدين بدأت أعمل الإيفنت علي أرض الواقع يوم كل فتره بأسعار رمزيه.
هل وجهاتك بعض الصعوبات فى العمل ؟
طبعا ف البداية واجهت صعوبة فى إني ألاقي نوع ألوان مناسب بجوده عالية، وسعر مناسب مش عالي، فضلت أجرب أنواع كتير لحد ما بقي عندي الخبره الكافية، وقدرت أبتكر نوع ألوان خاص بيا “Novofabriccolor”.
تذكرى ما هو اول عمل او رسمه قومتى بها ..وما هو احساسك فى ذلك الوقت؟
اول رسمه عملتها عالهدوم ..هي كانت صدفة وانا في المرحله الأعدادية كان عندي بنطلون جديد، واول ما غسلته الرسمه اللي عليه الوانها بهتت، زعلت عليه جدا بس قررت أعيد الرسمه عليه تاني ولما عملتها طلعت حلوة، والتجربة نجحت وعجبت كل اللي حواليا …فا إتشجعت وقررت أرسم علي حاجات تانيه ليا ولإخواتي ، ومن هنا بدأ الطلب من المقربين ان انا ارسملهم بس أنا محولتش موهبتي لشغل فعليا غير بعد ما إتخرجت من الجامعة.
ما هى الخامات المستخدمة لتدوير الاشياء القديمة والمعرضة لنفى..للوصول لمثل هذه الأشكال والرسومات الفنية الرائعة والمميزة؟؟
الخامات المستخدمه لإعادة التدوير كتير، في البداية كنت بستخدم الألوان المخصصه للقماش أو الجلد لتغيير الألوان وعمل الرسومات، ولكن بعد كده بدأت أدخل ماتريالز تانيه زي إضافة الأقمشه وتغيير ف قصات الملابس والشرايط الملونه والسوست والورود ….الخ
أقرا أيضآ:
السمكة الذهبية “كابتن هند حازم” بطلة الجمهورية فى السباحة للأعاقات الحركية
كلمينا عن دور عائلتك وزوجك واولادك فى حياتك وعملك ؟
بالنسبه لعائلتي..في البداية أمي كانت الداعم الأول ليا من صغري لأنها كانت بتشجعني دايما، وكانت علطول بتوفرلي الخامات اللي بحتاجها، وأكيد طبعا بوظت حاجات، وأنا بجرب وبتعلم مكانتش بتحبطني أبدا، ولحد الآن هي الداعم الأول والأخير.
تاني حاجه بناتي ..صحيح اوقات بحس ان مسيرتي اتعطلت شويه بسببهم لأن هما اعمارهم متقاربة جدا وكلهم تحت 6 سنين، وكان صعب جدا اعمل كل ده ف وجودهم بس الحمد لله قدرت ونجحت .
الحاجه الإيجابيه إن دايما بيبقوا معجبين وفخورين بيا وبفني، ونفسهم يبقوا زيي ودي أكتر حاجه بتسعدني.
تالت حاجه زوجي.. طبعا هو دوره مش كبير اوي ف حياتي العمليه ع انشغاله بعمله الدائم كمدرب لمنتخب الكونغ فو، ولكن هو بيشجعني وبيدعمني معنويا دايما.
هل ندمتى يوماً على قرار أخذتية فى حياتك؟
لا أبدا أنا مبندمش حتي لو أخطأت بحاول أتجه لتصحيح الخطأ لو قدرت، لو مقدرتش الندم مش هيفيد، اي غلط بتعلم منه وخلاص .
كيف تتعاملى مع صديق خانك؟
كيف أتعامل مع صديق خانني …بخرجه من حياتي فورا بلا رجعه.
ما أهم درس تعلمتيه فى حياتك المهنية والشخصية؟
اهم درس تعلمته ف حياتي المهنيه
رضا العملاء وسعادتهم أهم من الفلوس، وده بيديني سعاده أكبر لأن أنا فنانه مش تاجرة.
بالنسبة لحياتي الشخصيه …اهم درس اتعلمته
.مفيش داعي للعشم الزياده ف اي حد مهما كانت درجة القرب .
أقرا أيضآ:
“دينا سمير”تحديت نفسى فى تنفيذ أوبريت الليلة الكبيرة وأبنى هو سبب أتجاهى للتصميم
ما هى طموحاتك لمستقبلك المهنى؟
ان اسمي يكبر اكتر و فني والبراند بتعتي توصل للعالمية.
متى تشعر نفين كامل بالسعادة والرضا؟
حتي الآن معرفتش أوصل للإحساس ده، لأن كل ما بتقدم خطوه بقول الحمد لله بس لسه في أكتر، ولسه عندي حاجات أكتر عوزه أعملها.
ما هى التجربة التى تتمنى تكرارها فى حياتك؟
التجربه اللي أتمني تكرارها …اني أعمل فيديوهات تعليميه جديده.
رسالة تحبى انك توجهيها وتنصحى بها غيرك من السيدات لتغير وتجديد ما تلف من ملابس وأحذية ؟ ماذا تقولين؟
الرساله اللي بوجهها للسيدات…إن مش شرط يكون غلاء الأسعار هي الحاجه اللي تخليكي تجددي، وتعيدي تدويرالأشياء، مع إنه سبب مهم جدا برضو
إلا إن إعادة التدوير ده فن جميل هيخليكي تستغلي الحاجات اللي مركونة عندك، وحسه انها ملهاش لزمه بلمسه بسيطه ممكن تحييها وتكون قطعه أساسيه فى دولابك، أو فى بيتك ، وفن هتستمتعي بيه وإنتي بتعمليه، وهيساعدك جدا جدا وقت الزنقة والأزمات .
أقرا أيضآ:
“شيف سعاد البوعمرى” أمى من علمتنى أساسيات المطبخ وحبى للطهى سر نجاحى
