كتبت : شيرين محمد مدربة تربية إيجابيه معتمده من مؤسسة التربية الايجابيه الامريكيه
رحت للنادي النهارده الصبح بدري قولت اكتب مقال جديد … لكن اللي حصل خلاني اغير رأيي …. واكتب المقال ده … كان في ام قاعده علي ترابيزه جنبي ابنها جه وقالها جعان يا ماما و دار الحوار التالي :
الام : اتفضل سندوتش البيض . الطفل : مش بحب البيض .
الام : ليه ده البيض جميل انت عارف فوايد البيض وقيمته الغذائيه و قاعدت تديله محاضره عن فوائد البيض للصحه والطفل متنح وفعلا مش فاهم حاجة وبيقول لا مش عايز بيض مش بحبه .
الام : طيب احطلك عليه خيار . الطفل : لا مش هاكله مش بحب البيض .
الام بلهجه حاده : متقولش علي نعمه ربنا مش بحبها انت بتتبتر علي النعمه في اطفال جعانه في الشارع مش لاقيين اللقمه دي وبدأت محاضره تانيه عن الاطفال الجعانه ….
الطفل :طيب خلاص اديهم الاكل ده . الام : طيب وقامت ندهت الداده وادتها الاكل …. الولد راح يلعب وجيه بعد شويه قالها ماما انا جعان قوي … قالتله ما انا قولتلك هتجوع مش بتسمع الكلام ليه … شوفت كلامي صح ازاي … عشان تاكل كل نعم ربنا ومتقولش علي حاجه لا وبدأت محاضره تالته عن ان هي ماما وعارفه اكثر منك ….وهي طبعا فاكره ان الطريقه دي بتعلم ابنها درس ان هي صح وانه لازم يسمع كلامها بدون نقاش بعد كدة …. الام : استني هروح اجيبلك من الكافيتريا اكل …
تعالو نتكلم بقي
علماء النفس قسموا الاباء والامهات الي اربع انماط من حيث اسلوبهم المتبع في تربية ابنائهم … الوالدين المتسلطين …الوالدين المتساهلين …. الوالدين الغير مشاركين… الوالدين المتوازنين…مثال الام دي هي ام متسلطه هي شايفه ان ده الصح وان لازم ابنها يسمع كلامها لاما يبقي ولد غير مطيع و لو مسمعتش كلامي تتعاقب و مفيش حاجه اسمها اخد رايه او اديله اختيارات … طيب في ام هتقولي لا انا بدي لابني اختيارات و بقوله تحب تاكل ايه ؟ وانفذ اللي يختاره … احب اقولك انك مثال للام المتساهله اللي انت تختار هجيبه مفيش قواعد احنا اصحاب ومتحابين والطفل هو اللي بيحدد القواعد اللي يمشي عليها و طبعا بتستخدمي الهدايا والرشاوي عشان يسمع الكلام
طيب هتقولولي امال المفروض نتعامل ازاي هقولك يكون في توازن في التربيه اكون عطوفه وحازمه في نفس الوقت kind and firm وادي لابني خيارات محدده هنطبق ده علي المثال اللي فوق … الام قبل لما تروح النادي تسأل ابنها تحب اعملك سندوتشات بيض ولا جبنه كده انتي بتديله خيارات محدده قالك مثلا بيض او قالك جبنه … وجيه يكلها في النادي قالك لا مش هاكل مش عايز اكل بيض هتقوله الام للاسف هو ده المتاح لو مش حابب تاكل ممكن تلعب لوقت الغدا … هيرجع بعد شويه يقولك ماما جعان اوي … اكيد حبيبي انت جعان انا واثقه انك تستطيع الصمود لوقت الغدا … كده انتي حملتيه نتيجه قرارته وفي نفس الوقت بدون محاضرات ولا لوم ولا عتاب ولا تأنيب
دمتم إيجابيين
رئيس قسم هو وهي : داليا طه
