١-اعملوا قعدات فى بيوتكم دردشوا فيها واضحكوا واتكلموا مع بعض فيها كمان عن نفسكم وخططكم أو مشاريعكم وياريت مشاكلكم وتحاولوا تحلوها مع بعض وكل واحد يشجع التانى ويديلو طاقة إيجابية واشربوا في القعدات دى الشاى أو القهوة أو النسكافيه، واعملوا كيك أو حلويات زى الكريم كرامل أو فشار معاها وكلوها .
٢-هات بقى شطرنج وكوتشينة وسلم وتعبان وليدو وبنك الحظ وطلع الألعاب بتاعة جيل التمانينات ده اللى مايعلم بيه الا ربنا .
٣-شارك أولادك فى لعبهم واتواصل معاهم وصاحبهم .
٤-اخرج من بيتك للعمل أو للضرورة فقط غير كده بلاش، ولما ترجعوا من بره بلاش تدخلوا بيوتكم وتتجولوا فيها بالأحذية اللى كنتم لابسينها وطبعا ضرورى اليومين دول عدم التواجد في أماكن مزدحمة فيها تجمعات ناس كتيرة .
٥-رتبوا بيتكم من جديد ..واعملوا أفكار جديدة جواه .. واطبخوا أكلات مع بعض ماعملتوهاش قبل كده ..إبداعات بقى .
٦-اتخلص من الكراكيب اللى ملهاش لازمة ….انضفوا .
٧-بلاش تتابعوا اى أخبار سلبية تزود إحباطكم ….اتفرجوا على افلام مبهجة واستمتعوا مع بعض،اقرأوا كتب مفيدة .
٨- ممكن كمان تقوى من لغتك الأجنبية اللى اكتسبتها قبل كده أو تتعلم مبادىء لغة أجنبية جديدة من خلال تطبيقات الموبايل .
٩-اهتموا بالنضافة الشخصية ونضافة كل حاجة بتستخدموها ولازم غسل وتعقيم الإيدين كل شوية وخصوصا خارج المنزل وخلى بالكم جدا من نضافة الأسطح قدر المستطاع .
١٠-التواصل مع الأهل والأقارب ممكن من خلال التليفون أو النت .و طبعا ضروة تجنب السلامات بالأحضان أو بالأيدي أو القبلات مع أى شخص لحد ما الأمور تعدى على خير إن شاء الله على الجميع .
١١ – بلاش تصدقوا أى كلام تسمعوه من السوشيال ميديا لأن كتير منها بيكون مش صحيح ومجرد إشاعات ، وخلى دايما مصدرك تصريحات الحكومة أو الأطباء المختصين.
١٢- ولو كنت من الناس اللى بتحب التجربة فممكن تختار لنفسك عادة يومية جديدة لدقائق معينة تقدر من خلالها تغير شىء من حياتك زى (كتابة يوميات ) أو أبرز ما يحدث معك أو التعبد كقيام الليل أو وضع خطة ليوم كامل وتنفيذها من البيت …أو تفكر وتأمل لمدة معينة .
١٣- اهتموا بالأكل الصحى والسلطة والفاكهة والمشروبات الساخنة وكتروا من شرب الماء وكتروا كمان من مشروب الماء الفاتر بالليمون المحلى بعسل النحل فى الفترة دى والرياضة الخفيفة جوه البيت لزيادة المناعة والصحة.
١٤-وبالنسبة طبعا للطلبة و الطالبات من المهم جدا إنك ماتهملش دروسك وواجباتك لأن وقت الاجازة دى حيمر بسرعة .. فلو عليك أى التزامات كتيرة حاول تنتهى منها الأول ثم الانتقال للقيام بالنشاطات التانية أو أى هواية او أى حاجة بتحب تعملها زى ألعاب الموبايل وغيرها .
