بريد القراء أعداد: هويدا صابر سرور.
لو بصيت لنفسك دقيقه واحده في المرايه بتركيز وبعدها غمضت دقيقه وأنت زي ما أنت قدام المرايه هتشوف حاجات كتير أوي في الدقيقه دي ، أول ماتفتح هتفتح عينك أللي شوفت بيها نفسك في المرايه ، دي نعمه واحده من نعم ربنا بعدها هتشوف الباقي أللي مش هتقدر تعده ، أنا كان عندي أبن خالتي كان عمده عيب خلقي في القلب مولود بيه وأتوفي وهو عنده 10 سنين ، كان عارف أنه مريض وبيدخل المستشفي كل شويه سبحان الله رغم أنه طفل صغير مش مدرك للحياه كان دايما يقول الحمدلله أن شاء الله ربنا هيعوضني وهلعب في الجنه وربنا هيجيبلي كمبيوتر وبلاي أستيشن هناك وحد من سني يلعبني ، مامته كانت تتعصب عليه وكلنا كنا بنتعصب عليه ونزعقله أيه الكلام ، بعدها شوفت طفل صغير 7 سنين مريض كانسر بيقول الحمدلله شوية تعب وربنا هيرفعهم وغيرهم علي فكره ، أنا كل تفكيري أيه الأطفال دي مريضه ومحرومه من اللعب وأغلب وقتها مستشفيات وبيحمدوا ربنا وراضين وأحنا يا كبار أغلب الوقت يا بننفخ من الزهق يا نقول مكتئبين سبحان الله.
دي مشكلة ……؟
ياريت تنزل مشكلتى من غير أسم أو صورة .. أنا كنت مترددة كتير جدا قبل ما أبعت أنا بفضفض والله وإلى عنده حل لمشكلتى يقول وبلاش أستخفاف بمشاكل الناس أنا مش بعرف أتكلم غن نفسى ومش عارفة هعرف أوصل مشكلتى ولا لا أنا علي طول شايفة نفسى فاشلة وهفشل ف أى حاجة .. دى حاجة من أعراض الاكتئاب أنا مبقتش عارفة أتصرف أزاى .. يعنى مبقتش عارفة أتعامل مع الناس أزاى .. مش لدرجة أنى انطوائية وكدا .. لا أنا علي طول حاسة أنى شايلة هم .. مش بشوف نفسى بعينى لا بشوفها بعيون الناس ودى مصيبة .. وأنا نازلة الكلية أو أى مشوار وهقابل صحابى بحاول أشجع من نفسى والكلام دا .. ببقا خايفة أنى أخسرهم بسبب إلى أنا فيه أنا من 3 اسابيع فكرت أنى ليه أفكر في الناس طيب مافكر في نفسى وأول ماعملت كدا حسيت أنى مرتاحة وحسيت أن دى أنا .. بعدين يجى في دماغى أنى هفشل وهفكر في الناس تانى ومهما عملت هفشل وبالفعل فشلت ومبقتش عارفة أكررها تانى حاولت أقول لنفسى مسمعش الصوت إلى جوايا بس فشلت تانى يعنى أنا بحاول أحسن من نفسى ومش عارفة مش قابلة الوضع إلى أنا فيه نفسى أتحسن هتقولولى صلى .. أولا أنا الصلاة بقيت بعيدة عنها وأنا في دا بسبب أنى بعيدة بس حتى لما بصلى برده بقيت أكسل أصلى .. كسل فظيع ومش عايزة دكتور نفسانى أنا اقدر أعالج نفسى بس مش عارفة أعمل أيه بحس أنى مش عاجبة إلى قدامى مش شكلا بس لوأتكلمت وكدا بس أنا نفسى أبقى كويسة عشانى مش عشان حد تانى ولا أعجب حد أنا طولت بس نفسى ألاقى حل وإلى هيفيدنى يقول أو أللى مر بحاجة زى كدا .. يعنى نفسى أحس بسلام داخلى نفسي أتخلص من الافكار السلبية وشكرآ….
————————-
السائله الكريمه: في البدايه محدش يقدر يستخف بيكي أو بأي أنسان أبدا غير إذا كان أنسان جاهل ، بالنسبه للي بتمري بيه علي قد ما فهمت من رسالتك في غيرك كتير بيمروا بيه بيبعدوا عن الصلاه ، في كانت محجبه وقلعت الحجاب ورجعت لبسته تاني في أتحجبت في أنعزلت عن الناس تماما بتكون حالة لخبطه وكلها تصرفات من غير أقتناع تفكيرك فيها مصورلك أن الراحه في كده ، بجد في من الناس دي أتغير للأفضل وفي لا عشان هو عايز يفضل كده معندوش أي أستعداد أنه يفتح قلبه وعقله ويتغير ، سامحيني أللي أنتي بتمري بيه دا من وجهة نظري ومن ناس أتعاملت معاها مروا بظروف شبهك دا أسمه كسل متعمد وعدم ثقه بربنا وبالنفس ومتستغربيش ، أتكاسل عن الصلاه أتكاسل عن النزول وأدي لنفسي مبررات وأعذار أصلي هفشل وبفشل ، أنتي لاااااااازم تفشلي ، تفائلوا بالخير تجدوه أنتي مفيش تفائل خالص ، وأسوء صفه ممكن تقضي علي الأنسان هي التشاؤم تفضلي تتوقعي كل ما هو محبط وسئ لحد ما يحصل فعلا ، ليه كل دا أخسر نفسي وأجمل سنين عمري عشان تفكير غلط وسلبي مسيطر عليه ، أحتمال كبير من وجهة نظري تكوني أتعرضتي لموقف حد أنتقدك فيه بطريقه مش لطيفه ضايقتك أو حبيتي أنسان يا صدمك يا أنتي مكونتيش في دماغه لو كلامي دا صح راجعي حساباتك لأنك بكده أنتي بترتكبي أكبر غلط في حق نفسك أحنا ياما هنقابل لو كل حاجه قابلتنا ضايقتنا ننعزل بسببها ونبعد عن ربنا وعن حياتنا يبقي غباء مننا وظلم لنفسنا.
أخرجي من الحاله دي في أسرع وقت ، أبدئي بالصلاه أللي بيبعد عنها بتبعد عنه الراحه والرضا أنا مش عايزه أقولك الكلام المرسل لازم تصلي وكده حرام لا ، دي العلاقه أللي بينك وبين ربنا أوصليها فورا ، وأقوي شويه علي نفسك وعلي شيطانك بلاش أستسلامك ليهم ، بصي لنفسك في المرايه وأهتمي بيها نسقي لبسك أختاري الألوان أللي تمشي معاكي وتكوني بتحبيها ، مظهرك أهم شئ وكلها بحاجات بسيطه المهم نضيفه ومكويه ومنسقه وريحتي حلوه ووشي مظبوط بمكياج خفيف طرحتي مكويه أو لو أنتي بشعرك متسرح بطريقه لايقه عليكي ضوافر أيدي ورجلي نضاف والشوز نضيف وأنزل من بيتي كلي ثقه في نفسي ، أتكلم مع الناس علي القد أللي مش عايز يتعامل معايه دي مشكلته مش مشكلتي ولايفرق معايه ، أنا أحاسب علي كلامي وتصرفاتي ، وموضوع أني أفكر في نفسي ولا في الناس ، كل شئ بالمعقول أحنا مش عايشين في الدنيا دي لوحدنا النهارده لو حد من أهلي أو أصحابي محتاجلي أعمله أللي طلبه مني بحب وبدون مأنتظر مقابل مادام دا مش هيجي علي دراستي أو كرامتي مثلا ، طولت عليكي ويارب أكون قدرت أساعدك ووفقت في كلامي ليكي ، أحمدي ربنا وأتوكلي عليه وأستعيني بيه وهيساعدك علي قد ثقة فيه ، وربنا يصلحلك أحوالك.
