من اخلاق فارس الأحلام
كتبت/ شاهيناز عبد اللطيف
مرة كنت باتكلم مع انسانة عزيزة عليه…وباسألها
اشمعني جوزك ده اللي وافقتي عليه برغم ان بصراحة اتقدملك افضل منه عالاقل ماديا وقتها ؟؟
قالتلي رد اعتبرته دستور مفروض تمشي عليه كل بنت بتدور علي شريك حياة بجد يصونها
قالت: اثناء ما كنا في فترة التعارف سألته عن خطيبته الاولي وايه سبب انهم ماكملوش مع بعض !! وانتظرت انه يمدح في نفسه او عالاقل يجيب اللوم عليها
سكت كده ورد .وقال: كانت انسانة فاضلة بس النصيب..
??
?? صاحبتي قالتلي انا تنحت للحظة وفاكراه بيتريق وهيبدأ يشتم بعد شوية ..بس لاقيته استرسل وماقلش عليها كلمة واحدة فيها اساءة ليها..وسرحت انا وسألت نفسي
هو في لسه شاب محترم كده لما بتيجي سيرة انسانة ارتبط بيها وسابها مش بيذم ولا بيهين ولا بيخوض في عرض؟؟
ماتتصوريش الحوار اللي دار بيني وبينه وقتها عنها رفع قيمته وعلاه فنظري اد ايه
وقلت بيني وبين نفسي هو ده اللي اكمل معاه حياتي وانا مطمنه علي نفسي وقلبي وعقلي وان لو الزمن فرق مابيني وبينه فأي وقت او تحت اي ظرف مش ممكن هايجيب فسيرتي الا بكل خير
انا كمان ماسكتش وقولتلها وانتي لولا انك انسانة فاضلة ماكنش ربنا رزقك بشخص محترم كده
انا اعرف ازواج لما بيختلفوا مع زوجاتهم او الموضوع بيوصل لطلاق ..بيقول عليها ماقال مالك فالخمر.اللي هي اصلا عرضه او كانت في حكم مراته
بالمناسبة هما كملوا 15 سنة جواز ومن انجح القصص الزوجية اللي قابلتها في حياتي
عاوزة تعرفي الشخص اللي معاكي هايصونك ولا لأ ..شوفيه بيتكلم ازاي عن امه او اخته او بلاش دول ..شوفي هايتكلم ازاي عن اي انثي مرت في حياته بأي شكل من الاشكال
سواء زمالة او ارتباط لم يكتمل
الرجولة اللي بجد بتظهر اوي فالمواقف اللي زي كده بين مفردات الكلام وتعبيرات اللسان
