ظهر وبان.
بريد القراء أعداد : هويدا صابر
الخلاف في الرأي لا يفسد للود قضية ، لكن أي رأي ماهو في أراء أحيانا لما بتختلف بيكون في بسببها شتيمه أو ضرب أو كره وقطيعة أو قتل ، وبكده ميبقاش خلاف نهائي دي حرب ممكن تكون داخل بيت واحد وبين عيلة واحده ، زي الخلافات السياسية كتير بتكون هتوافقني الرأي ولااااا؟
دي مشكلة السائلة م ر:
أنا متقدملي عريس بحبه وبيحبني ومتمسكين ببعض جدا وهو مش فارق معاه حاجه في الدنيا غيري ، لكن المشكلة أن هو وأهلي مختلفين في فكرهم السياسي ودا عامل مشاكل كتيره أوي ، لدرجة أن أهلي قرروا أن الجوازه دي مش هتم أبدا وبابا قالي علي جثتي ، هتقوليلي عرفوا منين تفكير العريس السياسي حصل حوار عادي بينهم بان فيه فكر كل واحد رغم أني كنت مشدده عليه بلاش كلام في السياسه ، بس اللي يخاف من العفريت يطلعه وقلبت خناقه وشد ، انا مش عارفه أعمل أيه أنا بحبه ومقدرش استغني عنه وفي نفس الوقت أهلي رافضين مش عارفه أزاي أصلح بينهم.
السائلة الكريمة:
في مشكلتين شبه مشكلتك الأولي بنت أتجوزت حبيبها أللي بينه وبين اهلها خلاف سياسي لكن أهلها وافقوا لانهم كانوا شايفين أنه غني وهيريحها ماديا لكن طبعا في أي حوار سياسي يا ينفعل ويشتم من غير أحترام لسن أللي بيكلمه يا يسيب المكان كله ويمشي ، والبنت التانية كان أتقدملها عريس مختلف في فكره السياسي مع اهلها وفي قاعدة الأتفاق حصل حوار في السياسة بالصدفه قام العريس من علي الكرسي أللي كان قاعد علية وفجأه وشه في وش أبوها وبيتكلم بأيده وبيقوله انت أزاي بتقول كده ، البنت رفضته من غير تفكير وقالت أيه دا في أول قاعدة بينا وعمل كده بعد الجواز هيعمل أيه ، دا السيناريو أللي للأسف بيحصل في الجوازات ألي بيكون فيها خلاف سياسي أو خلاف ديني أسرة متشدده جدا وأسرة وسطيه في دينها الانتقادات بتكون كتيرة ، لأن دا فكر أنسان وجزء منه فالطبيعي أنه هيظهر ويبان من أول حوار مهما حاولتي تداري مافيش فايدة ، أنتي بتحبيه وقولتي أنه مش فارق معاه حد في الدنيا غيرك هل عندك أستعداد تتحملي المشاكل أللي هتحصل مع كل حوار وتتحملي أنه ممكن في لحظة يقولك يا أنا يا أهلك وتحصل قطيعة بينك وبينهم ، لوعندك أستعداد تمام حاولي تقنعي أهلك وشوفي حد قريب من والدك يقدر يقنعه بالموافقة عليه ، أصل دي مشاعرك أقولك أنا أرفضي أزاي أنا بس وضحتلك الأمور بناء علي تجارب مشابهه دا جواز مش هزار والمفروض تكونوا عيلة واحده بتحترم بعض ، ولااااازم تفكري كويس جدااااا قبل قرارك وتستخيري ربك ، واسأل الله ان ييسر لكي كل خير.
