تصرفات بنعملها واحنا بناخد شاور بضر شعرنا وبشرتنا
في الجو الحر الفظيع اللي احنا فيه ده يمكن يكون احلي حاجة بنعملها في اليوم كله اننا ناخد دش ساقع عشان نرجع نشاطنا و انتعاشنا من جديد و سواء كان الدش ده في اول اليوم او في آخره لازم نعرف كويس ان الدش ليه اصول وخطوات غلط اننا ننساها و نغفل عنها لأن إهمال بعض الحاجات اثناء الشاور بيأثر كتير علي جمال شعرنا و بشرتنا
1- غسل الشعر بالشامبو كل يوم:
غلط جدااااااااااا اننا نغسل شعرنا بالشامبو كل يوم و خاصة لو كنا بنستخدم شامبو غني بسلفات الصوديوم زي انواع الشامبوهات التجارية ديه (بانتين/ دوف/جونسون/هيد اند شولديرز/سباركيل/سن سيلك….)
كده انتي بتدمري شعرك و بتتلفيه بشكل بشع جداااااا و ترجعي تشتكي من جفاف شعرك و خشونته و تقصفه و تساقطه و…الخ
حتي لو كنتي بتستحمي كل يوم يبقا بحد اقصي شعرك يتغسل بالشامبو مرتين بس في الاسبوع
و استخدمي شامبو طبي زي (اكرينال/ جي كيه/كامينو موتو/تشي/موستيلا…
و كمان خففي الكمية اللي هتستخدميها لشعرك من الشامبو الطبي بشوية ماية في كوباية مثلا
كده هتضمني شعر نضيف و كمان صحي و متغذي و مفعم بالحيوية.. انتي نفسك مش هتصدقي ان ده شعرك 🙂
2- وضع بلسم الشعر او حمام الكريم علي فروة الشعر :
في بنات كتييييييييير جدا بتغلط الغلطة ديه و بتفتكر انها لما تدهن بلسم الشعر او حمام الكريم في فروة الشعر هيه كده بترطب شعرها و بتغذيه اكتر لكن اللي بيحصل غالباً هوه العكس و بالتالي الدهون بتتراكم في فروة الشعر و بتتكون طبقة مدهننة جدا (بتطلع في الضوافر مع الهرش) و طبقة الدهون ديه مع الوقت ممكن تعمل قشرة و كمان تتسبب في تساقط الشعر و ضعف نموه و كمان تقصف اطرافه و برده نرجع نسأل هوه ليه بيحصل كده لشعري مع اني بعمله حمام كريم اسبوعي و بهتم بيه و الاجابة هيه…انك صحيح بتهتمي بيه لكن بطريقة غلط فالفايدة بتقلب معاكي ضرر و هكذا
ملحوظة اللي بيتحط علي فروة الشعر هوه حمام الزيييييييييييييت اما حمام الكريم فا بيتحط علي اطراف الشعر و الشعر نفسه و بنبعد تماما عن فروة الشعر
2- اهمال تنظيف و تقشير قدمك :
مفيش شك ان مظهر قدمك الجذاب دليل علي جمالك … عشان كده متهمليش تقشير الجلد الميت من قدمك مع كل دش حتي لو كان تقشير سريع بالحجر الخفاف لمدة دقيقة او اتنين و تنظيفها جيدا بالماية و الشاور جيل خاصة بين الاصابع عشان تتجنبي نمو و تراكم البكتريا و الفطريات اللي بتعمل ريحة مش مستحبة للقدم مع الحر و العرق…
3- عدم غسل ليفة الاستحمام الخاصة بيكي بعد الشاور :
الليفة بتاعتك بعد الشاور بتكون مليانة جلد ميت كتير متراكم في تنياتها و اوساخ كتير و لاااااااااااازم تغسليها كويس جدا بعد ما تخلصي استخدامها
و مش بس كده لا ده كمان لازم تحطيها في مكان جاف تماما في الحمام عشان تنشف كويس من الماية لأن وجودها في الماية بإستمرار بيكون وسط مناسب جدا لنمو البكتريا و الفطريات فيها بشعل بشع و طبعا هترجعي تاخدي شاور تاني بيها و تكون الليفة بقت عبارة عن مصنع للبكتريا و الفطريات و ده هيأذي جلدك و بشرتك مع الوقت كمان هيسببلك ريحة عرق مش حلوة لما الفطريات و البكتريا ديه تتراكم علي جسمك من الليفة
4- في حالة ان كنتي بتاخدي دش سخن…اهمال استخدام الماية الفاترة في نهاية الدش:
في حالة اذا كنتي من محبي الدش السخن للصيف و الشتا لازم تنهي الشاور بتاعك بمجرد 30 ثانية من الماية الفاترة هتحقق ليكي التخلص من الإجهاد وزيادة قوة الجهاز المناعي وزيادة حرق الدهون وتأثيرات مضادة للإلتهابات…و كله عشان جمالك يا قمر يزيد 🙂
5- استخدامك للماية السخنة جدااااااااااااااا اثناء الدش:
استخدامك للماية السخنة جدا اثناء الدش هيضر شعرك و بشرتك جدااااااااا و الاتنين هيجفوا و ينشفوا و في بعض الاحيان ممكن يتسبب بإكزيما للجلد و حساسية و الشعر هيتساقط بغزارة
6- انك تفضلي تحت الدش لمدة طويلة جدا:
ده يعتبر من العادات السيئة اللي بتأثر بالسلب علي بشرة جسمك…لأن طول المدة اللي بتفضلي فيها تحت الدش جسمك و بشرتك بيفقدوا الرطوبة اللي محتاجينها و مع الوقت هتحسي بشرتك جافة علي طول و من كتير جفافها هتحسي فيها بالحكة 🙁
5- تنشيف جسمك بطريقة قاسية :
تنشيفك لجسمك بالفوطة بطريقة قاسية بيضر جلدك جدااااا و بيزود مشكلة جفافة و ممكن تحصلك حساسية في بعض الحالات
لازم تنشفي نفسك بفوطة قطن و بطريقة الطبطبة بمنتهى الرقة 🙂
5- اهمال ترطيب جسمك بمرطب مناسب بعد الشاور:
كلنا بنكسل و بنهمل اننا نرطب جسمنا بعد الخروج من الشاور بس لو عرفنا ايه اللي فايتنا اكييييييد كنا هنلتزم بترطيب جسمنا كويس جداا كمان بعد الشاور مش مجرد ترطيب عالماشي كده وخلاص…
لما هتنتظمي علي ترطيب جلدك بمرطب سريع الامتصاص و سهل الدهن و الاستخدام هتلاحظي الفرق في مرونة جلدك / و في لمعانة / و نعومة ملمسه طول الوقت /
هتلاقيه و لا جلد و بشرة نجوم السينما و الإعلانات 🙂 🙂
و من افضل المرطبات السريعة ديه :
كميات متساوية من زيت الأرجان (ترطيب عميق) و زيت الورد(تعطير) تحطيهم في ازازة فاضية و تمزجيهم مع بعض و تستخدمي كمية قليلة منهم علي جسمك بعد كل شاور
و لو عندك حبوب في جسمك يبقا :
3 كميات متساوية من زيت الأرجان (ترطيب عميق) و زيت الجوجوبا (بيحارب الحبوب) و زيت الورد (تعطير و ترطيب) تحطيهم في ازازة فاضية و تمزجيهم كويس و بردة تستخدمي كمية صغيرة منهم علي جسمك بعد الشاور
