شكرا للسوشيال ميديا إللى خربت حياتنا ودمرت علاقتنا مع ناس كتيير
كتب : هانى رفعت
ألسوشيال ميديا اللى خربت حياتنا ودمرت علاقتنا مع ناس كتيير وخصوصا أقرب ناس لينا …ونهت علاقتنا ببلوك
وخلت نبرة الصوت ملهاش لازمه وتعابير الوش شويه إيموشنز ? …
بوظت علاقات الأصحاب علشان واحده بترد متأخر وهى أونلاين او بتعمل seen ومتردش وبقت خروجاتهم انهم يفضلوا ماسكين الموبايلات ف نفس المكان وخلاص من غير ما يتكلموا ويضحكوا زى الأول
خربت علاقة أم ببنتها علشان شايفاها طول الوقت مشغوله وبعيده عنها .. أو خربت حياة اتنين مخطوبين أو بيحبوا بعض علشان هو قال إنه هينام بس فضل فاتح لحد وقت متأخر والمشاكل اللى بتحصل علشان واحده عملتله لايك أو إنهم يسيبوا بعض بسبب قلة الثقه علشان طلبت الباسورد وهو رفض وده كله بسبب السوشيال ميديا
بقت مشاكلنا عباره عن بوست و رد الناس ومساعدتهم بقت لايك..
السوشيال ميديا خلتنا بنحكم غلط على ناس كتيير ونخسرهم لأننا بنشوف غلط …بوظت كل حاجه وخلتها سخيفة وحتى الصدفه بقت انك تبعت حاجه لحد بالغلط او تتصل على حد غلط ويطلع الشخص ده هو اللى انت بتحبه مثلا
خلت حياتنا تبقى شويه حروف وخلاص والدموع اللى بتنزل واحنا بنتكلم مع حد كلام عادى محدش بيحس بيها وف الآخر بتتقال كلمة سلام من غير أى مبالاه
السوشيال ميديا خلتنا نكذب على نفسنا وعلى الكل وبقوا دلوقتى يصدقوا اللى بتقوله ف البوست مش اللى باين على وشك
بسببها بقا كتيير أوى داخلين على مرحلة اكتئاب أو بالفعل بقا عندهم اكتئاب…بقينا بنهرب من كل حاجه للسوشيال ميديا..
شكراا للسوشيال ميديا
