قدر ولطف.
بريد القراء أعداد : هويدا صابر
في حياتنا هنمر بتجارب كتيرهنتعلم منها ، والتجارب دي ممكن تكون صعبة علينا وقتها لكن مع الأيام الجراح هتداوي وهناخد نفس عميق وأحنا بنقول الحمدلله ، حقيقي الحمدلله قدر ولطف ، وقوتنا في مواجهة مشاكلنا بتساعدنا نخرج بسرعه وبسلام وقت أحساسنا بالخطر.
دي تجربة السائلة ي ن :
أنا أنسة 30سنة علي قدر كبير من الجمال ومن عيله مستواها الأجتماعي مرموق الحمدلله ، قصتي بدأت لما واحده قريبتنا جابتلي عريس وأتحايلت عليه دا شاب وغني وكل واحده تتمناه وحاولت تقنعني أنا وماما أني أنزل وأشوفه ولو مره واحده وقالتلي أنه من يوم مشافني عندها صدفه وهو هيجنن عشان يتقدملي المهم أوافق ، وبعد محاولات كتيره أقتنعت ونزلت قابلته أنا وقريبتنا في مكان بان أنه سخي ولارج في معاملته وأسبوعين ودخل البيت وأتقدم ورغم غناه الفاحش أللي هو بيتكلم عنه هو وقريبتنا قالي خطبني دلوقتي بدبله بس وأن شاء الله الشبكة بعدين عشان فلوسه كلها في السوق وهو أللي بيعمل نفسه بنفسه ، وتمت الخطوبة كل ما أخرج معاه لو عدي شحات في أشارة يطلعله جنيه ويقوله دعواتك ويفضل ماسك في الجنيه شويه بعدها يقولي الخير دا أللي هيقف للواحد ، طريقة كلامه أتغيرت منتهي قلت الذوق والعربجه وأبشع الألفاظ ، أكلمه فجأه ألاقيه قافل الموبيلات وميردش بالأسبوع ، بعدها يقولي أصل انا مكتئب ظروف شغلي أتغيرت والدنيا كلها واقعه أنتي شايفه ، وأبتدي يقولي معاكي كام في المحفظه ويمد ايده ياخده كل أللي فيها وطلب مني أتصرفله في فلوس بأي طريقة وهيرجعها تاني حتي لو حتة دهب هتتباع ، طبعا انا اتصدمت وأدركت أن واقعه في أيد نصاب ظهر علي حقيقته البشعه وهيستغلي مش واحد نيته جواز ، وأتكلمت مع بابا وماما بسرعه أتصلوا بيه ونهوا كل شئ أتجنن أني قولتلهم وأبتدي يضايقني ويهدد وأنا ولا هنا قولت في داهيه ، منكرش أني حبيته في الأول وأتضايقك وأكتئبت لكن قولت الحمدلله أنه ظهر في البدايه قبل فوات الأوان الحمدلله قدر ولطف وهكون بخير أكيد.
أختي الكريمة :
جميل منك جدا أنك أدركتي أنه نصاب وبيستغلك وشوفتيه علي حقيقته ولجأتي لأهلك رغم أني فهمت من كلامك انك حبتيه ، ومع ذلك وقت الخطر قولتي أستوب ودا دليل علي ذكائك وقوتك وادراكك للأمور ، ودا للأسف مبيحصلش من بنات كتير بتمر بتجربة شبه تجربتك للأسف بتداري علي الشاب وبتكمل معاه وبتعاني المرار بعد الجواز وبيختم أحيانا بالطلاق ماهو هاتي عشان أكمل وبيكون مستغل مظهره وعربيته أو البنت بتفضل معاه لحد ماهو أللي يسيبها لما يتأكد أن خلاص مش هيجي من وراها مصلحة ، وأحيكي علي أنك طمنتي نفسك في النهاية وقولتي الحمدلله هكون بخير، أنتي فعلا أن شاءالله هتكوني بخير مادام بعد عن طريقك أنسان كان هيكون معاه هلاكك وضياع حياتك ومكونتيش هتفرقي معاه أبدا ، أنتي جميلة وقوية وعرفتي تساعدي نفسك وربنا هيسرلك كل خير الدنيا وسعادتها.
