المستخبي بان.
بريد القراء أعداد: هويدا صابر
دايماً نسمع أن الكذب مالوش رجلين ، قول الحق ولو علي رقبتك ، أعرف دايماً أن مافيش حاجه في الدنيا تستاهل تخليك تكذب ، ولا أمور حياتك هتمشي بكذبه أللي ليك نصيب فيه هتشوفه ولو بينك وبينه جبال وبحور وأللي يكذب يكون قد كذبته ويستحمل نتيجتها لوحده.
دي مشكلة السائلة م ر:
أنا عندي 26 سنة اتخطبت لشاب اكبر مني ب 10 سنين وكان عندي فيروس c وأنا وأهلي عارفين دا وماقولناش للعريس حاجه علي أساس أني هخلص كورس العلاج خلال 6 شهور ، ورغم حرصنا الشديد عرف أني مريضه وسألني أنتي مريضه بأيه أنكرت وقولتله أنيميا قالي هاتي تحاليلك أعرضها علي دكتور صاحبي بالضغط كذا مره قولتله حقيقة مرضي قالي وماقولتوش من الأول ليه ، فرديت عليه أصلها كلها كام شهر وأخف ، بعدها بأسبوعين أمه أتكلمت وطلبت الشبكه وكل حاجه وقالت لماما كل شئ قسمه ونصيب ، أنا أتصدمت وأنهرت لأني حسيت أنه باعني وغدر بيه وبحسبن عليه ليل ونهار.
السائلة الكريمة:
أنتي كذبتي في البداية وأنتي وأهلك أخفيتوا موضوع أستحاله يستخبي لأن دا مرض والخطيب عرف رغم كل الاجراءات المشدده عشان مايعرفش حاجه عن مرضك وفسخ الخطوبه ودا حقه وقراره وأستحاله حد يلوم عليه ومش غلطان فيه لأنه هيفضل عنده هاجس ياتري في أيه تاني مستخبي عليه دي عيله كذبت عشان تجوز بنتها ، بلاش تعيشي في دور الضحيه المظلومه وليل ونهار حسبي الله ونعم الوكيل فيه ، الكذب مالوش رجلين زي مابيقولوا ، فكان ليه الأستعجال كان ممكن يتأجل موضوع الجواز وتاخدي كورس علاجك كامل وتتعافي وبعدها تفكري في الجواز وأللي ليكي نصيب فيه هتشوفيه ، كملي كورس علاجك وأهتمي بنفسك وتغذيتك وصحتك وأتعلمي أن الحياة مش بالعافيه والسرعه هتمشي أمورنا فيها ، أستعيني بالله وربنا يتمم شفائك علي خير وييسرلك كل خير وسعادة..
