بريد القراء أعداد:هويدا صابر
الحياه الزوجيه أساسها
التفاهم والإهتمام ، ولو عايزه تتجوزي يبقي الإلتزام بواجبات الزوج دي أ ب
جواز ، تهمليه عشان فلانه وعلانه ، ماهو لو بيتك أتخرب لا فلانه ولا علانه
هيقفوا جنبك هيكملوا حياتهم عادي وإحتمال يشمتوا فيكي ، وقت الجد محدش
بينفع حد ، والزوجه العاقله لما ربنا يكرمها بإنسان محترم عارف واجبات بيته
وزوجته بتقدر دا وتكون معاه واحده بواحده وتخاف عليه وعلي قرشه ، ومبدأها
أن الجنيه اللي معانا النهارده إحنا وأولادنا أولي بيه بكره ، لا بتتمنظر
بقرش جوزها ولا بتطمع فيه وتقول ماهو كله لينا ، أما كلمة إشمعنا فلانه
مبتعمرش بيت ، وصلت؟
—————————
دي مشكلة السائل م م:
أنا شاب عندي 30 سنه متجوز من حوالي سنه وكل أموري الماليه وشغلي كويسه
جدا وربنا مرزقنيش لسه بأطفال ، وزوجتي كانت أختيار من أحد زمايلي في الشغل
هي بنت خالت مراته وشوفنا بعض وعجبتني هي كانت هاديه وقليلة الكلام
وأتجوزنا في 6 شهور مشكلتي بدأت من أول يوم جواز ، مراتي بتحكي لأمها علي
كل حاجه أدق التفاصيل وأمها كمان تتصل بيها وكلام في الموبايل بالساعات
بتحكيلها اللي حصل مع أختها أو مع حد من قرايبها تخلص كلام مع أمها ألاقي
أختها تتصل شوفتي قريبتنا فلانه حصل معاها أيه ، لحد ما في مره سمعتها
بتحكي لأمها عن تفاصيل اليوم أللي قضيناه عند أمي بالكامل لدرجة أمي كانت
لابسه أيه وأخواتي وأيه الأكل والغريب أن اليوم أللي بنكون فيه عند أمي
ممكن تدخل أوضة أخواتي بالساعه والساعتين بتعرف أخر الأخبار من أمها أو من
واحده من أخواتها ، أتكلمت معاها كتير مفيش فايده ، وأللي زاد اليوم أللي
بتتجمع فيه عند أمها مع أخواتها و مرات أخواها ، ترجع متغيره ومتجننه وشوفت
جوز أختي جابلها أيه شوفت أخويه عامل أيه لمراته أنا عايزه زيهم أشمعنا هي
، أشمعنا أختي ، دا غير أن أكتشفت أن أمها بتحرضها أطلبي منه كذا خليه
يجيبه ، وبقولك دا يا أستاذه لأن الحوار حصل قدامي أمها قالتلي فيها أيه
لما تجيبلها طقم دهب زي أختها ، فرديت عليها قولتلها أنا مش حرمها من حاجه
وجايبلها دهب من شهرين هو الدهب بيتجاب كام مره في السنه ، ترد أمها تقولي
وماله زيادة الخير خيرين ، أنا كرهت حياتي أنا عامل زي أللي عايش مع وكالة
أنباء عالميه رويترز وأحيانا بحس أني بنك ، وأقسم بالله يا أستاذه أنا كرهت
أزور حد من أصحابي وهي معايه لو شافت عندهم حاجه عجبتها قدامهم عايزه زي
دي بكون في نص هدومي وترجع خناق وعايزه زيها ، لدرجة أن عفشنا كله جديد
طبعا عايزه تغير الأنتريه والسفره وتجيبهم زي أللي شافتهم عن واحد صاحبي
وتجيب غسالة أطباق وتلاجه زي أللي عند أختها والخروجه لازم تجيب أخواتها
ولازم أدفع ما لا يقل عن 1000 جنيه عشان المنظره قدامهم وهكذا ، أنا كجوز
فين لا بتسمع كلامي ولا بتهتم بيه كلام أمها بس غير كده لا ، أنا محتاج
راحه وأهتمام في بيتي وتركيز في شغلي عشان مستقبلي ، وصدقيني أتكلمت معاها
كتير ، وأمي وأخواتي أتكلموا معاها تكدب وتقول كلام عنهم محصلش كل دا عشان
عايزاني أبعد عنهم بكل الطرق وتبقي هي وأهلها بس ، أنا عملت واقفه من
أسبوعين ورجعتها بيت أهلها ومفيش حد أستشرته غير لما قالي طلقها دي متصلحش
زوجه وأحمد ربنا مفيش منها عيال ، والرجاله الأمينه من عيلتي أللي أتدخلت
في الموضوع عشان تحل كلهم قالولي عايزه ترجعلك بشرط وهتسمع كلامك تكتبلها
الشقه بأسمها وتجيبلها طقم دهب تصالحها بيه ويكون ردهم عليه دي عيله جعانه
طلقها وأخلص ، ماعدا صاحبي في الشغل حرام عليك رجعها دي غلبانه ، أنا غلطان
أني ماشي في أجراءات الطلاق ومصمم عليه وهديها حقوقها لأن أنا أللي مقرر
الأنفصال؟
——————–
السائل الكريم: اللي أنت بتحكيه دا
وضع غلط وسئ وطبعا أنت لما شوفتها ظهرتلك أجمل ما فيها هدوء وكلام قليل ،
والجواز كان خلال 6 شهور طبعا محدش مركز مع التاني كل واحد فيكم عايز يلحق
يخلص ألتزامات الجواز أللي وراه مفيش وقت نعرف بعض ، أنت أتفجأت بيها من
أول يوم جواز عاشقه للرغي ونقل الكلام زي البيت أللي طالعه منه أمها
وأخواتها كده ، دا غير الطمع المبالغ فيه وللأسف الأم كده بردوا عندها نفس
المشكله الطمع ، وعلي ما أعتقد أنهم نظام خلصي فلوس جوزك أول بأول متخليش
في جيبه حاجه ، للأسف زوجتك مستهتره وغير متحمله للمسؤليه زي البيت أللي
أتربت فيه ، وختمت علاقتكم بأسوأ ما فيها أكتبلي الشقه وهاتلي طقم دهب عشان
أرجع وأسمع كلامك ودا أثبت دليل أنها مش هتتغير ، والزوجه أللي يكون دا
تفكيرها ودي تصرفاتها أزاي تكون أم هتربي أولادها أزاي علي الطمع ونقل
الكلام وأنهم يبصوا للي في أيد غيرهم أستحاله هتربيهم علي الرضا والقناعه
وتعلمهم يحمدوا ربنا كل شئ وكل حال لأنها متربتش علي دا ، والأطفال الأساس
في تربيتهم الأم هي أللي بتكون متواجده معاهم أغلب الوقت ، لذلك فعلا أحمد
ربنا زي ما الكل قالك أن مفيش منها أولاد وأستعوض ربنا وأديها حقوقها كامله
وطلقها ، وركز في شغلك لأنه مستقبلك وكيانك وأن شاء الله ربنا يعوضك
بالأحسن والأفضل منها وتراعي ربنا فيك وتكون عارفه يعني أيه واجبات زوج
وبيت.
