. 
بريد القراء أعداد: هويدا صابر
في ناس أتربت علي عدم المسؤليه ، وفي وقت الجد تلاقيهم معاك بس بقلبهم أو بفلوسهم ، لكن تاخد من وقتهم ومجهودهم وتشيلهم الهم وتقولهم بكره المفروض هنعمل كذا والنهارده ورانا كذا ، يقولولك لا منعرفكش لحد كده وأستوب أحنا أخرنا معاك من بعيد لبعيد.
دي مشكلة السائله: ن ج
أنا متزوجه من 15 سنه وربنا رزقني بأربع أولاد منهم أبني التاني بيعاني من مرض التوحد مفيش دكتور مرحتلوش وبهتم بيه جدا ، وببذل قصاري جهدي معاه عشان يتحسن ، المشكله أن جوزي دايما يعايرني بأبني المريض هو وأهله بيقولولي دا نتيجة اهمالك وأستهتارك مش عارفه ليه وأيه ذنبي في مرضه ، ومفيش مره يروح فيها معايه للدكتور أبدا ، ولما أطلب منه تعالي معانا لأي شئ يخص أبنه يقولي مش أنتي السبب أتحملي نتيجة غلطك لوحدك وبعدين أي فلوس بتجتاجيها بتخديها مش كفايه ، هو مش مهتم بينا وبيسمع كلام أهله بأستمرار في كل شئ حتي أني السبب في مرض أبني وبسمع منهم كلام بيخليني أبكي طول الليل وأشيل هم علي همي ، أنا المسؤله عن أولادي الاربعه في كل حاجه تخصهم وجوزي عباره عن محفظه بس ، فغصب عني أحيانا كتير بحس أني محتاجه ليه سند ورجل معايه مش فلوس بس هو مش جوزي وأبوهم ، أنا بصراحه تعبت جدا ومش عارفه أعمل ايه فيديني أطلق مادام كده كده انا المسؤله عن أولادي.
السائلة الكريمه:
أنتي بقالك زوجه ليه 15 سنه ومتغيرش محملك مسؤلية أولادك الأربعه لوحدك دا غير لومه ليكي علي أبنك المريض رغم أن المرض دا شئ بأيد ربنا ملكيش أي دخل فيه ، بس زوجك بيحملك السبب في مرض أبنه عشان يخلي مسؤليته عنه وفي نفس الوقت يريح ضميره لأنه عارف كويس جدا أنه مقصر تجاه أبنه فيقول لنفسه ماهي السبب في أللي حصله ياله تشيل لوحدها ، وجوزك مش عايز كل شويه تقوليله ياله نروح لدكتور الفلاني أو في مركز متخصص لحالة أبننا تعالي معايه ، هو مش بيحب يشيل مسؤليه وأتربي علي كده بدليل أهله مأييدين كلامه في أنك السبب عشان عارفينه ، هو كل أللي بيعمله يديكي الفلوس أللي محتجاها ليكي ولأولادك وأتصرفي أنتي ، للأسف في زوجات كتير بتعاني من نفس مشكلتك مفتقدين الرجل والسند في حياتهم زوجات بالأسم بس وضيفي بقي أن أغلب الأزواج دول مشيلها الحمل كامل حتي المصاريف ، الحمدلله أنتي جوزك بيصرف وبيديكي أللي انتي عايزاه كله وبيخرجكم ، لو أتطلقتي هتعيشي لوحدك من غيره وبالتالي مصاريف ولادك هتطلب بالتليفون أبعتلي كذا يقولك حاضر لما أفضي وتدخلي في دايرة مشاكلها كتيره والبعيد عن العين بعيد عن القلب ، مادام مسؤله عن ولادك لوحدك وهو متكفل بمصاريفكم كلها من غير تقصير ، خلاص خليكي مسؤله عنهم في بيت أبوهم وقدام عينه ، تطلقي ليه وأنتي مبتشتغليش ولا في دماغك تتجوزي رجل تاني وفي رقبتك أربعه منهم طفل مريض ، أنا رأي الشخصي أن حالتك بلاش فيها طلاق لأنه مش هيضيف ليكي حاجه وأصبري وحاولي تتكلمي معاه بهدوء مره وأتنين وتلاته علي مسافات من غير عصبيه يعني مش كل يوم يتفتح الموضوع دا انت فينك من حياتنا أنت المفروض تشاركني ، صدقيني محدش عارف بكره فيه أيه ، أدعيله بالهدايه وصلاح الحال يمكن يتغير ، وفي حاجه أنا عارفه لازم أقولك عليها رغم أنها ممكن تكون صعبه عليكي في وسط مسؤلياتك بس مفيش شئ صعب أبدا ولا مستحيل الست تقدر تعمل كل شئ أرجوكي أهتمي بنفسك وحبيها وأرجعي بصي في المرايه شوفي نقصك أيه وأعمليه وغيري في مظهرك ومتخليش الهم والمسؤليه يأثروا عليكي وعلي شكلك وتدي عمر أكبر من عمرك بسنين ، حاجات بسيطه لو أتعملت هتفرق في نفسيتك وممكن تكون مفتاح لقلب جوزك ، وربنا يصلحلكم الأحوال ويهديكم.
