استشارة وحل مقترح
السلام عليكم
في الاستشارة أم عندها بنت ست سنوات خجولة و ضعيفة الشخصية بعد فترة عناد
و اخ 3 سنوات أناني وبياخد منها كل حاجة
ارجو انكم تقروا الاستشارة دي لانها مجرد نموذج لعشرات الاستشارات اللي وصلتني بهذا المعنى مع اختلاف شوية ظروف..
كلنا ممكن نكون الام دي
نص رسالة الأم:
السلام عليكم انا بينتي عندها 6 سنين وهي من صغرها وهي عنيده بشكل فظيع جدا فوق التخيل وباباها مدلعها جدا هي واخوها ومش بيحب يزعلهم خالص وطبعا كنت بضربها بسبب اني التفاهم مش بيجيب معاها نتيجه بس دلوقتي حاسه ان ممكن التفاهم يجيب معاها نتيجه شويه بس بعد ما تعمل حركات بوشها وتتكلم كلام في سرها مشكلتي اني بحسن انها بعد العند دا كله انها منساقه وان ملهاش شخصيه خالص واي حد من اصحابها يقولها اعطيني مثلا القلم دا ولا ازعل منك تعطيه القلم او اي حاجه تخصها وبعدين بتتكسف من اي حد لدرجه انها مش بتسلم علي مامتي وبابايا ولا علي اصحاب باباها ولا الجيران ولما نكون في حديقه او النادي مش بتحب تلعب مع حد مش تعرفه ولا تحب تعطي الكوره بتاعتها لحد ومتحبش اخوها او اولاد خالتها يلعبو مع حد غريب وطبعا الاولاد في النادي بيتريقو عليها وعندي اخوها 3 سنين بياخد منها كل حاجه وهي علشان تخاف عليه انه يعيط بتعطيه كل الحاجات بتاعتها وبحس انه بقي اناني جدا وعاوز كل حاجه لنفسه وعلي فكره انا روحت بيها قبل كدا لدكتوره سلوكيات علشان اعرف حل في الكسوف وانها منساقه وقالتلي ان هي ماشاء الله عليها ذكيه بس عاوزه تندمج مع المجتمع الخارجي وانا مش عارفه اعمل ايه لاني حاسه اني بجد فشلت في تربيتها وتربيه اخوها واسف علي الاطاله وارجوكي فديني
و كان ردي :
السلام عليكم ورحمة الله وبركاته
كان عندك بنت قوية الشخصية، ودليل قوة شخصيتها كان العند اللي ظهر من السنة الثانية و كان لازم نتعامل معاه صح اننا نتفاهم وما نعاندش قدام البنت
و لكن للاسف. بضربك ليها، كان قدامها حل من اتنين، يا اما تزداد عناد و عنف، او تنكسر و تبقى الشخصية اللي انتي شايفاها دي
ومش صح ان التفاهم دلوقت بقى مجدي. او مفيد التفاهم ما بقاش يجيب معاها نتيجة..بنتك مجبرة تسمع كلامك، والحركات اللي بتعملها بوشها و الكلام اللي في سرها هي البقية الباقية من قدرتها على التعبير عن رفضها للي بتعمليه فيها
التفاهم بقى يجيب نتيجة عشان الضرب كسر ارادة البنت
بنتك بقت تخاف. و اخوها ربنا يحميه بيستغل الموقف صح، هي بتخاف لحسن تزعقي لما يعيط، فبقت تستسلم له و هو بقى يستخدم سلاح العياط.
والشخصية (الخجولة) اللي فيها بنتك دي نتاج الصد الشديد لعفويتها و عنادها اللي كان طبيعي، و دا أثر على تواصل البنت الاجتماعي مع الاخرين
وممكن تكون ثقتها بنفسها اتأثرت عشان كدا اي حد يقولها هاتي حاجة و الا هازعل منك تديهاله عشان مش عايزة تخسر الدائرة اللي تعرفها اللي هي بتعرف تلعب معاها، واللي يدمر الثقة دي بالنفس و يزيد اعراض الخجل والرغبة في الانطواء هو (الاولاد في النادي بيتريقو عليها)
طيب نعمل ايه:
1- شجعيها و امدحي الحاجات الكويسة اللي بتعملها اولا بأول و بشكل مكثف، لانها محتاجة تثق في نفسها، و كافئيها على كل الحاجات اللي بتعملها لوحدها، عشان تشجعي استقلاليتها
2- شجعيها على التعبير عن احباطها من المواقف اللي بتتعرض لها، يعني مثلا لما حد يتريق عليها في النادي او اولاد خالتها يضايقوها اتكلمي معاها و قولي لها انا عارفة يا حبيبتي انك ممكن تكوني متضايقة، قوليلي ايه اللي ضايقك، ممكن اول عشر مرات ما ترضاش تتكلم معاكي ولكن مع الوقت ولما تثق فيكي و في ان عندك رغبة صادقة في الاستماع اليها هاتبدأ تتكلم
3- دائما اتكلمي على نقاط القوة اللي فيها، و بلاش حد يقعد يقول انها خجولة اصلها بتتكسف، الكلمة دي بتخلي الحاجز اللي جواها يعلى اكثر و اكثر، و تبتدي تستسلم ليه و تبطل تحاول تتعامل مع العالم اللي ما تعرفوش
4- اقرأي لها قصص، و احكي لها حكايات، و خليها تعبر عن رأيها في اللي قريتوه، بنتك محتاجة تعرف ازاي تعبر عن حاجة عجبتها او ضايقتها و دا بيكون بفتح باب الحوار معاها بحاجات زي دي
5- ما تتوقعيش في يوم انها تكون شخصية اجتماعية تدخل اي مكان وتلعب مع اي حد ما تعرفوش، احنا بنحاول نعدل السلوكيات للحد اللي تقدر تتأقلم فيه بعد فترة بسيطة مع محيط جديد. يعني خليكي واقعية في توقعاتك منها
6- انصفيها مع اخوها، يعني لما يعيط عشان عايز منها حاجة روحي قولي لها لا هو بيعيط ما تديلوش حاجة، و هايزعل شوية و يبقى كويس
7- اوكلي اليها مهمات بسيطة في البيت تساعدك فيها و كل ما تنجز حاجة امدحي وشجعي و هللي و كلمي بابا و خالتو و عمتو و كل اللي تعرفوهم
8- جربي تقعدي هي و انتي و اخوها ترسمو عشان يعبرو عن نفسهم، و يا ريت لو في فرصة ترسلي لي الرسومات دي عشان اشوفها
احضنيها كتير و حبيها كتير
اقري موضوع التأديب بدون عقاب (متوفر في الصفحة ) و ابتدي طبقيه مع الولد و البنت دي الطريقة اللي تقدري تخلي الاتنين كويسين و شاعرين بالمساواة
ابنك في فترة حب التملك فعادي يكون شوية (أنوي) مش اناني، و الفرق ان الانوي دي صفة هاتروح مع الوقت بس هو الطفل بيكون عايز يكون محور كل حاجة وبيفكر في نفسه الاول
ممكن احنا نحوله لاناني لو استسلمنا لنوبات بكاءه و ما حكينالوش قصص تعلمه حب الاخرين وفضلنا نخلي اخته خايفة منه كدا
انتي مش ام فاشلة ولا فشلتي في تربيتهم، انتي اخطأتي و تمن خطأك بنتك دفعت جزء كبير منه، ارجو انك تشتغلي كويس الفترة الجاية عشان نصحح الوضع، لانه قابل للاصلاح جدا
اتمنى تطمنيني بعد ما تقري و تبدأي تطبقي
تحياتي
دعاء صفوت
