كتابة .. رانيا الجعبري
…لو بس ترجعي ……
لو بس ترجعي مش هسيبك تروحي في مكان لوحدك…
مفيش مناسبه إلا وهكون فيها جنبك…
مفيش مجامله إلا وهاجامل معاكي …
لو بس ترجعي طلباتك أوامر .. مفيش عشم بزيادة .. مش هقول هي فاهمه ومستحمله ..
اتعشمي فيا انا ..
لو بس ترجعي مش هجيلك عشان ارتاح لأ هاجي أريحك…
لو بس ترجعي مش هحكي مشاكل وهموم هحكي انا اللي يريحك ويطمنك ..
لو بس ترجعي هصدق انك فعلا مش قادره ومش هقول بتدلع .. ولو بتدلعي ياستي انا موافقه بس ترجعي ..
وحشتيني… وحشتينا كلنا
وحشني كلامك وصبرك وتصبيرك لينا ..
وحشني أكللك اوي ..فاكره لما كنا بنسهر للصبح نعمل محشي . ولا بتزهقي ..
وتهزقيني لما اقولك مكفايه كده .. وتقولي يلا يابت قومي امشي من هنا .. انت رغايه وعمايلك كلها منيله. ..
وحشني ريحتك. . شكلك وانت بتصلي …
لما تصحي من صوت ضحكنا وفينا تبهدلي … يلا يابت قومي هاتي اشرب واتنيلي نامي شويه ياختي عشان تصحي تكملي..
..
طب فاكره لما كنتي من الفجر تراقبي من الشباك وتتعجبي البت اللي قدمنا لسه راجعه.. لو ليها أهل يمكن مكنتش تبقى فاقده……
مش ناسيه يوم مقالولي انك متي.. جيت وبقيت اقولك ليه بعدتي. ليه فطمتي بدري.
بيقولوا في الفطام كرهي ابنك وعوديه يختار يبعد بس جوه حضنك بتأكلي وتكبري. .
فطمتي فجأه.. ليه ياأمي…
عاوزه احكي ياأمي. . بجيلك وبحكيلك بس مش بتردي…
احساسي انك جوه ومش لامساكي بيقهرني…
هو صحيح انت ليه في أحلامي دايما ساكته.. زعلانه و بتضحكي برضه ساكته
مشيتي بس زرعك موجود بنحب بعض ونخاف علي بعض اللي وقفتي جنبهم لسه واقفين معاهم .
ربنا دايما كارمنا بسببك. .. لما بنعمل خير علي فكره انت السبب .. بفرح اوي لما الناس تحبني ويقولوا أمها ربت اكيد…
شكرا ياأمي وسامحيني علي تقصيري مع أنه والله قلة تفكير… عيله وكنت متعشمه بزيادة …
طب ممكن بس لما تيجي في الحلم تطولي. وحاولي تتكلمي..
الله يرحمك ياأمي
