ان لم تستحي ففعل ماشئت
كتبت . رانيا الجعبري
مش قصدي من عنوان المقال البجاحه أو قلة الادب .
أقصد حاجه بسيطه أن مفيش كسوف مفيش خجل.. الشخص اللي مش بيهموا حد ولا بيهموا عادات ولادين .. المهم يعمل اللي هو عاوزه. ..
هو سؤال نفسي كلنا نسأله لنفسنا. .
أمتي هنفرق. .. وامتي هنعرف..
أمتي هنفرق بين الزوء والصراحة. ..
أمتي هنفرق بين المفروض والواقع ..
أمتي هنفرق بين النفاق والمجامله. ..
هل ينفع اقول لشخص معاق بأي نوع من الإعاقة. . انت معاق كده ليه أصل انا مبحبش النفاق…
ولا أبسط حاجه أننا أحاول أتعامل معاه علي أنه شخص عادي …
هل ينفع شخص مجنون أفضل أركز مع كل كلمه بيقولها وأقول مفيش حاجة اسمها مجنون .. ازاي بيقول كده … أصل انا مبحبش التطبيل. .
ده بقي بيطبق علي حياتنا ازاي …
نفسي اعرف ..
… امتي هنعرف أننا منردش علي حد أكبر مننا حتي لو بيشتمنا. .
… أمتي هنعرف أن الطفل طفل ومينفعش نركز معاه وننتظر انه يتصرف كأنه تم 21 سنه…
… أمتي هنعرف أن الست مينفعش ترد علي جوزها أو تنتقده بالذات في وجود أي حد .. حتي لو أولاده …
… امتي هنعرف أن الراجل ميقعدش يدلع مراته أو العكس في وجود ناس كبيره أو حتي صغيره..
ده اسمه عدم احترام والله مش حب .. ( محبكش قدام الناس)
… أمتي هنعرف أن الراجل ليه احترامه والست ليها احترامها قدام أولادهم. ..
… أمتي البنات بالذات اللي لسه متجوزيين هيعرفوا ازاي يتعاملوا مع حماتهم وحماهم حتي لو مش عاجب سيادتها تصرفاتهم…
… أمتي هنفهم أن الاهتمام بضيافة حد انا مبحبوش و والتعامل بزوء مع الناس ملوش علاقه بالنفاق..
… امتي هنفهم أن جملة اللي في قلبي علي لساني دي غلط ..
مينفعش كل اللي في القلب يتقال.. طب ليه ربنا ادانا مخ نفكر بيه قبل منتكلم…
… أمتي هنفهم أن حرية الرأي والتفكير مش معناها بجاحه وسفاله وقلة أدب. ..
… أمتي هنفهم أن مينفعش نتدخل في الكلام لو في اتنين أكبر مننا بيتكلموا…
… أمتي هنفهم أن علاقة الست بأهلها علاقه خاصه …
… امتي هنفهم أن الست متدخلش في علاقة جوزها بأهله وتحترم خصوصايتهم.
… امتي هنفهم أن الكلام ليه وقت وشخص معين يتقال فيه .. مش كل حاجه تتقال لأي حد وفي أي وقت …
… امتي هنفهم أن مش عشان نثبت لحد أننا بنحبه نركز نوصله قد ايه الناس التانيه بيكرهوه.
… أمتي هنفهم.. إن الأخلاق والتربيه أهم من الفلوس ..
… أمتي هنفهم أن ربنا بيرزقنا عشان ناس تانيه اصلا فمش لازم نقلق اوي كده أننا بنصرف الفلوس اللي ربنا ادهالنا. ..
… أمتي هنفهم أن مساعدة الناس في الشارع أو مساعدة أي حد ده حاجه عاديه جدا مش معجزه يعني. ..
… امتي هنفهم أننا لازم نشكر أقرب الناس ..
نشكر أهلنا انهم ربونا وصرفوا علينا وطلعونا لينا اهميه مش حراميه. .. ونحاول نرد ده طبعا..
الراجل يشكر مراته علي اهتمامها بيه وأولاده وبنضافة البيت والأكل الحلو ..
الست تشكر جوزها انه موفرلهم عيشه مرتاحه بياكلوا وبيشربوا وبيلبسوا وبيخرجوا. هو بيتعب عشان يعمل ده ..
… امتي هنعرف أن احترام صاحب المكان اللي بنشتغل فيه ده واجب مش مجامله … ولو مش قادر أتعامل معاه اسيب الشغل..
..
… أمتي هنفهم أن مش معني أننا بنكره حد يبقي لازم كل منشوف وشه نقوله انا بكرهك أو حتي بملامحنا. . ممكن احتفظ بالكره ده لنفسي
… أمتي هنعرف أن في حدود في العلاقات .. بلاش العشم الزياده
تحت حجة أصل انا طيب اوي وبتعامل بتلقائيه…
… أمتي هنعرف أن الدنيا حقوق وواجبات..
… أمتي هنميز أن لو حد قاعد مبسوط نأجل الكلمه اللي هتنكد عليه لوقت تاني..
… أمتي هنعترف أننا غلطانيين ونعتذر ..
… أمتي هنبقي مدركين أن الحياه سلف ودين أمتي بقي؟ ؟ ؟ …
نفسي نفهم ونفرق ونعرف ولازم نميز تصرفاتنا. ..
متدخلش في اللي ملكش فيه..
## الأخلاق والتربية أهم من الفلوس..
## الزوء والأدب ملوش علاقه خالص بالطيبه والصراحة. ..
## ليس منا من لم يرحم صغيرنا ويوقر كبيرنا….
## أبوس ايديكوا لو مفيش دين يبقي امشي ورا العادات والتقاليد أو حتي التربيه والأصول ..
##:انا عارفه هنفهم واحنا في طريقنا لصورة المقال. .
