ثروت بديع
تعمل ايه لو كنت مجرد!!!
فعل مضارع
من غير بكره
وكان إمبارح
أسوأ ذكرى
كنت مجرد وأنت صغير
زى الفعل ف حالة المصدر
ضُرِبَ حتى جزعه اتكسر
حوشى يا أما
ها أحرم يا ابا
نَزَفَ الفعل
هَرَبَ الطفل
ويا جروحه
بال على روحه
نزل الشارع
بات فى خرابه
تعمل ايه لو كنت مجرد!!!
طفل مجرد
يظلك كوبرى
يذلك شارع
تعمل ايه لو كنت مجرد!!!
ولمين تلجأ
لما يبقى رصيفك أمك
كل الناس تهرب من ريحتك
رافضة تضمك
حتى الملجأ
حتى لما غاروا الظلمة
وقامت ثورة
ماجابت سيرتك
تعمل ايه لو كنت مجرد!!!
طفل مجرد
م الأكل مجرد
م اللبس مجرد
م الحضن مجرد
تعمل إيه لوتعرف إنك
إسمك طفل
وإن أبوك أسمه شوارع!!!
مدير قسم الادب والشعر
علا السنجري
