بقلم دكتورة زينب زكى
اعمل الشئ اللى يسعدك مش اللى يسعد الناس وخللّي طموحك ” فِكرة وهدف ” ونفذّ الفِكرة وحقق الهدف..عُمر السعادة ” قصيّر جداً .. ومتوقّفش حياتك على حد و لا تخلّي حِلمك و قلبك تحت رحمة حد .. ولا تسلّم مفاتيح الأمان اللي بتملكها لأي ايد ممكن تفرّط فيك بسهولة ..ومتخليش طموحك ” إنسان ” ؛ما تخليش طموحك جوازة والسلام ..أو عيشة والسلام ..ليه ؟ تعالو نشوف ..
* لو علّقت آمالك على جِناح بنى آدم هتخسر كتير وهينكسر جِناحك انت لأنه مش ملاك ده بشر مُعرّض للتقلبات الجوّية القلبية و الدماغية ركّز على كلمة تقلّبات دي.
* لو استنيت إن حد يسعدك هتموّت فيك فِكرة السعادة نفسها و رغبتك في تحقيقها هتقلّ …
* متخليش طموحك ” جوازة والسلام ” ما تعلّقش حِِلمك في سقف جَوازة تخسّرك عُمر .. ركزّ أولاً ازاى تختار شِريك العُمر،إزاى تلاقي روح تشبهك ؛مش لازم حرفياً ،بس على الأقل روح ما تستهلكش اللّى باقي فيك “روح ” تجمّل فيك القُبح اللى انت نفسك كاره تعترف بيه .. روح تصلّح فيك اللي خرّبته الأيام…
*متخليش طموحك إرضاء الناس لأنك مهما عملت لا هتعرف ترضيهم ولا هتقدر تمنع الحقد اللى معششّ في بعضهم …
* متخليش طموحك جسد متناسق وقوام ممشوق ووزن مثالي صلّح اللى جواك الأول و اعرف نفسك كويس وحِبّـها بجد وافهم أهدافك حقق التوازن النفسي قبل الجُسمانى” ارضى عن نفسك أولاً ووقتها هتحقق المِثالية اللى بتتمناها …
تحياتى للجميع
ماما زوزو
