والدتها كل حياتها وأكثر المشجعين والداعمين لها
الزواج ليس عائق أمام أحلامها
تتسم تصاميمها بالفخامة والشياكة
أفضل المصممين لها إيلي صعب ودولسي اند جابانا
حوار / ريما السعد
تصميم الأزياء هو فن يتسم بالتجديد والتنوع. والإبهار ، و هو فنٌّ من فنون تطبيق التصاميم، والجماليات، يتمّ تصميمها على أدوات ومكوّنات مختلفة كالملابس والاكسسورات ، وهو الكيان المبتكر والمتجدد في خطواته ومساحاته اللونية ، وخاماته المتنوعة .
ويعتبر مصمم الأزياء المحرك الاول في عالم الموضة ، إذ لديه القدرة على ابتكار أزياء تناسب الجمهور أو العميل
حوارنا اليوم مع مصممة الأزياء سمر مبروك
ممكن تحديثنا عنك وعن أسرتك وماذا تعني لك الأسرة ؟
سمر مصطفى مبروك
خريجة كلية تجارة قسم محاسبة ، كنت بتمنى ادخل فنون جميلة او هندسة بس مجموعى مدخلنيش، متزوجة وعندى بنتين جنى وجايدا، وعندى احن واطيب واجدع أم فى العالم كله، طول عمرها بتقوينى وبتشجعنى وبتدينى طاقة ايجابية، أمى هى كل الحياة ، ليا اخين ولاد سامح وسمير ، سمير الله يرحمه وسامح ربنا يحميه ويباركلنا فيه اخويا الصغير اللى دايما بسند عليه وباخد رأيه فى كل حاجة وتعب معايا جداً فى مشوارى
اسرتى كل حياتى واهم حاجة فى حياتى
هل الزواج والأمومة عائق امام احلام سمر مبروك؟
لا الحمد لله الزواج والامومة مش عائق لان كل اللى حواليا بيسعدونى ودايما ساندنى
كيف دخلتي عالم الأزياء ؟
طول عمرى كنت بلبس حلو اوى وبعمل اكسسوارات واطرز الملابس بتاعتى، ومن هنا كل الناس طلبت منى شغل وابتديت اعمل لصحابى وبعدين فتحت ستور وكنت حابة انه يبقى مميز وفيه حاجات مختلفه فابتديت اصمم من هنا لكى اتميز، وفى يوم لقيت تليفون جايلى من قناة تليفزيونية من قسم الاعداد وبتقولى حضرتك شغلك حلو اوووى ويستحق يظهر للنور ويتعرض معانا فى البرنامج ومن هنا ابتديت البرامج التليفزيونية والشهرة
من أكتر المشجعين والداعمين لسمر مبروك ؟
من اكثر المشجعين ليا امى ثم امى ثم امى وزوجى احمد واخويا سامح ربنا يباركلى فيه
كيف تصفين تصاميمك ؟
بحاول اقدم تصاميم مختلفة ومتميزة ، وتتسم بالفخامة وبقدر جدا قيمة الهاند الميد فى الملابس ودايما بسعى انى اقدم تحفه فنية فى هيئه ملابس
أين تجدي مصادر إلهامك ؟
بجد مصادر الهامى فى كل شى فى الطبيعه
من المصممين المفضلين لديك ؟
المصممين المفضلين ليا ايلى صعب ودولسى اند جابانا
حديثنا عن أحدث مجموعة من تصاميمك ؟
احدث مجموعه ليا سميتها الكوليكشن الملكى the royal winter
حيث تتسم بالشياكة والفخامة فى خاماتها تعبت جداً فى الكوليكشن عشان يظهر بالشكل ده
هل تحاولي اخفاء عيوب الجسم في تصاميمك ؟
اه طبعا بحاول ادارى العيوب
ماهي النصائح التي توجيهها للمرأة العربية عند اختيار ازيائها ؟
احب اوجه نصيحة للسيدة العربية اهم شى البساطة وتنسيق الألوان
ما هي خططك المستقبلية ؟
بتمنى ان شغلى يبقى في جميع انحاء العالم
هل دور الأزياء المحلية قادرة على تنافس دور الأزياء العالمية ؟
اه قادرة على التنافس احنا عندنا فى مصر مصممين هايلين ومبدعين فعلاً
