شيرين محمد مدربة تربية إيجابية معتمده من مؤسسة التربية الايجابية الامريكية
سيبوا اولادكم يحسوا بمشاعرهم بلاش بقي كلمات من نوعية (متزعلش. متضايقش.متخافش. مفيش حاجة تستاهل انك تضايق الموضوع بسيط. متعيطش. مفيش راجل يعيط
الكلمات الجميلة دي بتخلي المخ بشكل لا ارادي يركز ويفتكر كل المواقف اللي مرت علية واضايق فيها او خاف فيها . كل مشاعر بنحاول نقومها المخ بيركز عليها.
الاطفال مش بيعرفو يعبروا عن مشاعرهم كل اللي مطلوب منك تعريف مشاعره … عشان يتدرب يعبر عن اللي حاسس بيه ويعرف اسم الشعور اللي حاسس بيه.
تخيلي كده نفسك لو انتي مضايقة من موقف حصلك وجوزك جه قالك .. متضايقش الموضوع تافهه وبسيط وسهل يتحل مش مستهله انك تبقي مضايقة وانتي مكبره الموضوع ياتري هتحسي باية … انه مش حاسس بيكي وله فارق معاه مشاعرك وهتتخنقي اكتر وهتفتكري كل حاجة حصلت وضايقتك قبل كده
طيب تخيلي لو رده عليكي ياه انا حاسس انك مضايقة … تعرفي انا لو مكانك وحصلي الموقف ده كانت هبقي مضايق
انا واثق انك هتلاقي حل للموقف ده ياتري هتحسي بايه … هتحسي انه حاسس بيكي ومقدر زعلك ومحتويكي… وعرف يتعامل مع مشاعرك طيب ده هيبقي شعورك انتي الكبيره ما بالك طفل لسة مشاعره بتتكون هيبقي سعيد ازاي وهيشعر بالانتماء والاهمية.
الطفل لو انكرتي مشاعره هيحس ان مشاعره دي حاجة تافهه مينفعش يعبر عنها وبيقي قصده اختيارين لاما ينزوي ويكتم مشاعره دي ويدور علي حد يحس بية ويعوضة عن اللي مفتقده …. او يبدأ يعبر عن مشاعره بشكل غلط انة يزعق.. يشتم.. يضرب …ما احنا مدربنهوش علي التعامل مع مشاعره والتعبير عنها … ونرجع نقول الولاد اخلاقهم بقيت زفت … مع ان احنا السبب اصلا في اللي وصلو لية .
اتعاملوا مع المشاعر.. متنكروهاش سيبوه يعيش مشاعره ويحس انها حاجة طبيعية من حقة يعبر عنها و اللي حوليه يحسو بيه وبلاش الله يخليكوا التقطيم واللوم والعتاب
مثلا لو طفل ضيع مقلمته او لعبتة بلاش بقي كلام من نوعية (انت مهمل . متسيب . مش بتعرف تحافظ علي حاجتك .هخصم فلوسها من مصروفك .مش هجيبلك حاجة تاني) علي فكره الكلام ده مش هيرجع المقلمة ومش هيخلية يحافظ علي حاجتة بالعكس ده لو ضاعت حاجة تاني هيخبي عليكي عشان خايف من ردود فعلك .. وهيبدأ يكدب عشان خايف.. و نرجع نشتكي ان الولاد بيكدبو مع ان احنا اللي وصلناهم لكده .
طيب نتعامل ازاي في موقف زي ده ..
هتقوليله ياه انت شكلك زعلان اوي .. انا حاسة بيك … تعرف انا وانا قدك ضاعت مني مقلمتي وزعلت اوي برده
ممكن تفكر هتحل الموضوع ده ازاي واسكتي ارجوكي اسكتي
وسيبية هو يفكر في حل ممكن يقولك مش لازم يكون عندي مقلمة خلاص ده اختياره …. او ممكن يقولك هحوش واجيب واحده تانية خلاص برحتة …. المهم انتي متديش حل بلاش نعيش دور المنقذين لاولدنا سيبيهم يفكروا ويشغلو مخهم … ويتحملو مسئولية اخطائهم … الاطفال يتعلمون من اخطائهم
وبلاش دور الواعظ والمواعظ ده مش هيعلمهم حاجة
دمتم ايجابين
رئيس قسم انت الحياه: داليا طه
