بقلم / ريهام محمود
مهتمة بالصحة العامة والاسرة
كلنا عايشين فى الدنيا بنقضى العمر اللى ربنا حدده لكل واحد فينا ، بنجرى فى زحمة الحياة عمرنا ماسألنا نفسنا ياترى احنا مبسوطين ، ياترى حاسين بطعم حياتنا ولا اهى عيشة والسلام .
مفكرناش اننا ممكن فى لحظة منبقاش موجودين فى الحياة لان الفرق بين الحياة والموت بس لحظة .
يعنى فى لحظة واحدة ممكن نتحول من شخص موجود فعلا لمجرد ذكرى او اسم كان فى يوم موجود .
السؤال هنا بقى واللى لازم كلنا نسأله لنفسنا هو لو الزمن وقف بينا عند اللحظة دى واحنا عارفين انها اخر لحظة ياترى هنعمل ايه وهنفكر فى ايه وايه اول حاجة هنقرر نعملها فى اللحظة دى قبل متنتهى وتنتهى معاها حياتنا ؟
هو ده الفكر اللى لازم نعيش بيه اننا نتعامل مع كل يوم فى حياتنا على انه اللحظة دى .
نعمل كل اللى نفسنا فيه ، نعيش حياتنا اللى بنتمناها ، ونشوف ايه اللى يسعدنا ونعمله .
نحاول ان ميعديش يوم من عمرنا غير واحنا بنعمل حاجة بنحبها و ناويين كل يوم الصبح اننا نخلى اليوم ده احلى يوم .
ندور جوانا على حلمنا اللى نفسنا نحققه ونفضل وراه لحد ما يتحقق وبعدها ندور على حلم جديد وهدف جديد .
نفكر ازاى نسعد الناس اللى بنحبهم ، نعبر لهم عن مشاعرنا لانهما كمان ممكن فى لحظه ميبقوش معانا ومنقدرش نشوفهم ولا نقدر نسمع صوتهم ، هنكلمهم مش هيردوا علينا وقتها هنشتاقلهم اوى وهنتمنى لويرجعولنا بس لحظة علشان نعوضهم ونقولهم قد ايه بنحبهم ونعطيهم كل وقتنا علشان نسعدهم بس للاسف بيكون فات الاوان لانهم مش هيرجعوا تانى .
علشان كدة بلاش نضيع على نفسنا فرصة اننا نعبر للى بنحبهم عن شعورنا ، بلاش نستخسر فيهم وقتنا بحجة اننا مشغولون، بلاش نتأخر لاننا مش ضامنين اننا هنبقى معاهم بكرة ، علشان منحسش فى يوم بلحظة ندم بعد فوات الاوان.
بلاش نندم على قرار خدناه لاننا اكيد وقت ماخدنا القرار ده كنا مقتنعين بيه ونفسنا ننفذه حتى لو القرار ده طلع غلط هنبقى على الاقل عيشنا التجربه اللى لو مكناش عشناها كانت هتفضل بالنسبة لينا المجهول والحلم اللى كان نفسنا نحققه ومتحققش .
بلاش نسيب نفسنا فريسة للاحباط واليأس واللامبالاه .
لازم نعرف ان كل يوم بنعيشه هو هدية من ربنا وفرصة اننا نحقق فيه كل اللى بنتمناه علشان كده حرام نسيبه يضيع من غير مانعيشه صح.
عيشوا حياتكم واستمتعوا بيها على قد ماتقدروا حتى لو وقعتوا قوموا تانى وكملوا ومتخلوش اى حاجة توقفكم علشان الفرق بس لحظة .
رئيسة قسم صحتك بالدنيا /نهى على
