محدش حيطبطب عليك
بقلم : إخلاص عبد المحسن
مطلوب منك تبقى قوي
و ألف حاجه بتهد فيك
و تبقى ثابت رغم الألم
و رغم الحمل اللي عليك
و رغم الحزن تبتسم
و اللي في قلبك يتكتم
و مهما ضهرك يتقطم
شايل هموم الناس حواليك
رغم انهم دايما ناسيينك
و مهما تعمل مش شايفينك
غير لما يبقوا محتاجينك
تلاقيهم يتقربوا ليك
لو تصرخ صوتك مش مسموع
كاتم جواك و انت موجوع
و الدمعه في قلبك من سكات
تنزل بهدوء من جوه عينيك
شايل هم الكل على كتافك
ناسي نفسك عايش شمعه لغيرك
فكر تطبطب يوم على روحك
محدش حيطبطب عليك
