لا فاقد الشئ يعطيه
بريد القراء أعداد : هويدا صابر
مين قال أن فاقد الشئ لا يعطيه ، بالعكس أحيانا يقدر يعطيه أكتر من صاحب الشئ نفسه وبكل حب وأخلاص ، لكن أحنا أللي دايما نظرتنا فيها الأنانيه وأحيانا فيها تجريح وأهانه للأسف.
دي تجربة السائلة رع:
أنا أنسه عندي 38 سنة الحمدلله عندي كل شئ مش محتاجه حاجه من حد ربنا سترها معايه ، مش محتاجه غير الحب من أللي حواليه وأنهم يبدلوني نفس شعوري ناحيتهم لكن للأسف بلاقي غير كده خالص ، أخويه الاصغر مني اتجوز وخلف أول بنت وكانت أمها بتشتغل في وقت الشغل تسيب البنت معايه أراعيها وأعملها كل حاجه زي أمها بالظبط من غير تقصير ولو خارجين تكون معايه والبنت بتحبني جدا ومرتبطه بيه وانا بحبها ، لكن لما ألاقي ابوها عايز يضربها أقوله حرام أمها وأدافع عنها لانها بتجري عليه ألحقيني يا عمتو ، أمها تتقمص وتقوم من المكان وأبوها يقولي أكتر كلمه جارحه ممكن أسمعها وأنتي مالك هي بنتك وهتعرفينا نربيها أزاي ، أسكت وفي نفسي أقول هي بنتي وقت مصلحتكم بس ، وقيسي علي دا كل شئ لو واحده متجوزه من قرايبي لما تحكي مشكله ليها وأقولها تعمل تقولي أنتي تعرفي أيه هو انتي متجوزه الغريبه أنها تنفذ نصيحتي ليها، أنا معنديش مشكله أنا راضيه بكل شئ وعارفه أن جوايه حب لكن المحيطين بيه وعيني مبتنزلش علي نعمه في أيد غيري لكن أكيد من جوايه بحزن وبختلي بنفسي.
أختي الكريمة :
أنتي فعلا معندكيش مشكلة خالص غير انك بتتعاملي مع عقليات عقيمة الفكر كل أللي مسيطر عليها أن فاقد الشئ لايعطيه ، وجرح الأخر عندهم سهل بدون وعي لمجرد أن مش فأيده النعمه ، رغم ان الكتير مننا ممكن يكون مفتقد للسعاده أو الحب أو الحنان ومع ذلك عنده المقدره أنه يحب كل أللي حواليه ويسعد غيره ويكون أحن عليهم من نفسهم ويدعمهم وقت أزماتهم ، والناس أللي بتفكر بالطريقة دي صعب تغيرها ولازم تكوني مدركه دا وانتي بتتعاملي معاهم أنك هتسمعي الكلام أللي يضايقك أحيانا عيشي مع نفسك ولا كأنك بتسمعي حاجة بالعكس ردي بمنتهي الثبات والقوة وايه يعني أني مش متجوزه أو معنديش أولاد الحمدلله راضية ومبسوطة بحياتي وربنا ييسرلي الخير والصح ، وأنتي انسانة جميلة ربنا أداكي نعمة الحب والاخلاق ودول أكبر نعم في الحياة وبتراعي ربنا في كل أللي حواليكي وبكره هتجني ثمار حبك دا لما تلاقي أولاد اخوكي بارين بيكي وبيسألوا عنك ، ومحدش عارف بكره فيه ربنا بيغير الحال في طرفة عين ، وأسأل الله لكي راحة البال والقلب والسعادة وكل خير.
