النهاردة الحقيقة عاوزه اتكلم في موضوع شاغلني من فترة… وهو الفيسبوك.
من خلال تجربتي الشخصيه وتجربة كل اصدقائي فيه بلا استثناء.
بصراحة احنا مجتمع ما ينفعش فيه اننا نستخدم حاجه زي دي. لأننا ببساطة معندناش ثقافة تقبل الآخر ولا احترام الأخر وبنقحم نفسنا في خصوصيات الغير.
احنا مجتمع مش قادر يستوعب أن الفيسبوك مساحة شخصية….. هي اه مش سرّيه لكن مش من حق حد يحاسب حد على اللي كاتبه ولا من حق حد يحلل بمزاجه.
فيه ناس ممكن تفتح صفحتك وتعمل مؤتمر مع أصحابها لتحليل كل كلمه بتكتبها (أبراج مراقبه يعني).
ويا سلام بقى….. لو كتبت اي حاجة سلبيه أو حزينه تبقى كئيب وبتصدر النكد وبتخزي عين عن السعاده الرهيبة اللي بتعيشها.
ولو كتبت انك مبسوط أو حققت نجاح معين في أسرتك أو أولادك أو شغلك…. يبقى الرد احنا ايه ذنبنا تشركنا في كل ده، ما تراعي إن فيه ناس ما عندهاش.
ولو انتقدت أشخاص…. يبقى أكيد بتلقح الكلام على حد.
ولو رومانسي….. يبقى أكيد قصه حب وياترى مع مين.
أما بقى لو كتبت في السياسة…. يبقى يا ويلك…. ماهو يا إما تكون مؤيد للنظام وبالتالي مغيب ومطبلاتي وانقلابي…. أو تكون معارض…. فإنت إرهابي أو خاين وعميل وأمريكا بتمولك.
*نيجي بقى للطامه الكبرى *
لو مريض ويا سلام بقى لوالمرض مميت.
لو قلت انك تعبان…. اووووف بقى ما كل الناس تعبانه…. أو هايبعدوا علشان الحسد والفأل وكده.
ولو قلت إنك صابر….. يبقى بقى ده فاكر نفسه من أولياء الله.
أما لو ((تناسيت)) إنك مريض ومشيت في الحياة تستمتع بيها أو تحاول تبسط نفسك… يقولوا :
ده ناسي ربنا
ماله الدنيا لاهياه كده ليه
هو ناسي إنه على حافه الموت؟ ارجع لربنا يا أخي.. توب…صلى… ما تخليش الدنيا تغرك.
***
**هو أنت دخلت في قلبه؟ هو أنت ربنا علشان تحكم عليه؟
هو أنت تعرف العلاقة السريه بينه وبين ربنا علشان تخلّي نفسك المرشد اللي بينصحه وبيدله على الطريق الصحيح؟
هو انت تعرف هو أتألم قد إيه؟قلبه اتجرح قد إيه؟ كام ليله عدت عليه مش عارف ينام من ألمه و دموعه وقهره قلبه؟
(((ما تخليك في حالك)))
نيجي بقى للمطلقه و الأرملة….. محدش راحمهم والله….. نازلين فيهم سلخ….. كأن المطلقه دي واحدة مش تمام عاوزه تقلب أي واحدة في جوزها.
وكأن الأرملة دي مش بني آدم.. لازم تقضي الباقي من عمرها بعد وفاة زوجها لابسه أسود وبتعيط وبتشحت وملطشه لكل واحد ولازم تخرس وما تنطقش.. مش من حقها تتنفس ولو بكلمه.
لو كتبو بوست انهم زعلانين يبقى اكيد عينهم وحشه وحاسدين ولازم نبعد عنهم.
ولو كتبوا بوست فيه اي حاجه عاطفية حتى لو عاطفه الابوه يبقى اكيد بيرسموا على حد.
(((ارحموهم يرحمكم الله)))
نيجي بقى للي بيحط بوستات كوميديه وده أقل واحد في الانتقاد…… بيتقال عليه تافه بس ?
والله لو كل واحد احترم نفسه اولا قبل ما يحترم غيره هايريح وهايستريح.
ولو كل واحد خلاه في حاله مش هايلاقي وقت لتحليل كل شخص عمال على بطال.
ياريت نستخدم شبكه التواصل دي للتواصل الإيجابي ولتقويه الروابط بيننا وبين الناس اللي بتبعدنا عنهم مسافات طويله أو ظروفنا الحياتية أو للمعلومات والأخبار.
خلينا نتعامل بالنيه الطيبة وبالظن الحسن ونحترم حرية الآخرين وما نتدخلش في مساحتهم الشخصية.
فيه ناس كتير رفضت اضافتهم لاني عارفه إنهم داخلين يراقبوا ويحللوا بس.
وياريت بعد كل اللي كتبته ده محدش بقى يفقعني و يقولي إنتي تقصدي مين بالكلام ده.
ده انتقاد مني لموقع الفيسبوك اللي مش قادرة استغنى عنه لأنه وسيلة التواصل القويه بيني وبين اصدقائي واحبائي اللي كلهم بيعانوا من كل الكلام اللي كتبته…. وكمان بذكر نفسي وبذكركم اننا ما نقعش في الأخطاء دي.
بقلم رانيا السيد
