فضفضه … مع/ حاتم رأفت
زمان وانا في تانيه اعدادي سمعت واحد بيقول لواحد يابني انت لسه بتاخد مصروفك من ابوك . الكلمه استوقفتني ومافهمتش ايه المقصود منها . اومال الواحد ياخد مصروفه من مين . جريت على امي رحمها الله كانت طبيبه . مديرة اداره صحيه . حكيتلها على اللي حصل . ضحكت وقالتلي ده بيعايره علشان مش بيشتغل وبيمد ايده لابوه وبياخد منه المصروف وده مش من طبع الرجاله . الراجل لازم يعتمد على نفسه ويقدر قيمة العمل . بصراحه . انا خدت الكلمتين ومشيت . وبالليل وانا بانام فكرت وسالت نفسي . يعني انا كده مش راجل . وقررت اشتغل . تاني يوم قولت لامي انا عاوز اشتغل . قالتلي انت شغلتك تلميذ . تذاكر وتجتهد في دروسك وبس . قولتلها يعني ابقى راجل في الدراسه وعيل في الاجازه . المهم ما اطولش عليكم . اقنعتها اني انزل اشتغل في الاجازه . بشرط ان الشغل يكون في صيدليه واحده صحبتها ونزلت اشتغلت انا وابن صاحبة الصيدليه . وهو صديقي .
هو انا باحكي الكلام ده ليه ؟
اااه .سمعت الشيخ عمر عبد الكافي بيتكلم عن البنات والولاد . وواجب الاب تجاه كل واحد فيهم . قال ان البنت ملزومه من ابوها من لحظة ميلادها وحتى يوم زفافها . واذا رجعت لابوها سواء ارمله او مطلقه عادت ملزومه منه مره اخري . اما الصبيان فبمجرد بلوغه لا يكون ملزوم من ابيه .
لقيت الغرب بيعملو كده . الراجل يبقى غني وعنده ملايين وابنه بيشتغل في محطة بنزين .
ناس عاوزه تربي جيل بيقدر قيمة العمل . مش جيل كرمي على القهاوي مستنى القوه العامله . ولما يجرله الجواب يلاقي المرتب تعبان ف يكبر دماغه ويستحلى قعدة القهوه . ونرجع نشتكي من البطاله .
يا ريت نربي جيل رجاله . مش جيل مرفه مفيش في دماغه غير انه يطول شعره زي البنات ويلبس مقطع والتابلت مش بيفارق ايده . والاغرب تلاقي ابوه فرحان بيه ويقولك انا ابني نابغه في التكنولوجيا انا لما باكون عاوز اعمل حاجه على الموبايل بادهوله يعملها .
احب اقول لحضرتك . اتوكس . التكنولوجيا اللي حضرتك فرحان بيها هي اللي بوظت عقول افضل شباب في البلد . وانا اقصد الشباب اللي داخلين في التكنولوجيا من باب الثقافه . النت اللي ابن حضرتك عليه ليل ونهار وبيستقي معلوماته وثقافته منه . كله معلومات مغلوطه . كله افكار بتدمر مجتمعنا . كله افكار عاوزه تهدم عقيدتنا وعادتنا وتقالدنا . عاوز ثقافه حقيقيه . ارجع للكتاب من تاني . واستغل وقتك في اي عمل . يا اخي لو انت راجل غني . اول ابنك ما يبلغ نزله معاك الشغل . لو صاحب تجاره . خليه يشيل ويتهد حيله علشان يقدر يفهم شغلك كويس ولما يكبر يكون سند وامتداد ليك . لو انت راجل موظف . شجع ابنك انه ينزل يشتغل فترة الصيف . علشان مستقبله مش علشان يجيب قرش للبيت .
عودو اولادكم على العمل من صغرهم واحنا نقضي بجد على مشكلة البطاله . في فرص عمل كتير . بس ولادنا احنا دلعناهم وماخلناهمش ياخدو الى المرمطه .
ربو رجاله تنفع نفسها وماتربوش عيال بتاخد مصروفها من ابوها . او عيال يفضل يسحب مشارب ع النوته .
واهي مجرد فضفضه
إقرأ أيضا
