ثروت بديع
————
احساسك وانت طفل
شكلك مختلف
لبسك مختلف
حجمك مختلف
املك مختلف
ريحة عرقك تختلف
فهمك للإله مش فهم ناس كتير
احساسك انك مش ضمن الفريق
احسن مركز ليك تبقى جون
احساسك غريب رهيب خطير
أن الاختلاف مهواش فى صالحك
والنظرات ليك بتختلف عن كل العيال
جواك الفرق بين جبال الجليد والبركان
شعرتين
مش عارف امتى تكون فرحان
غضبان زهقان
حاجات كتير بتختلف وتختلط
وتبقى انت
عجينة الارتباك وغياب القرار
طعم المرار اتعود عليك
ببجبر بخاطرك
يطبطب عليك الخوف
تستخبى بين كفوفه
زي عصفور بردان
دورت ع الشجر مالقتش فيه ورق
حاجات بين ضلوعك بتنحرق
وتعيش بسرعة وتموت بالتصوير البطىء
كانت حياتك سريعة
مرت حياتك مملة بطيئة
النهاية بعد شيبة راح تكتب كلمتين
وتوريهم للصحاب.وتضحك
ضحكتك زي التراب بتعفره
زي السراب زي السحاب
اول ماتوصل تلاقيه اختفى
بصراحة أنا بدور علي انا
بدور على انا الحقيقى
اسلم عليه قبل الرحيل
احتياج للفهم انا ابقى مين
رفيع تخين
فاسد امين
كل الحاجات بتختلف
كل الفهم بيختلف
لكن ماظنش انى فهمت
اتعلمت
كداب كبير مسيطر
على كل الحاجات
احساس بالاختلاف اتلخبط واتهبب
ومات وخلاص
مات فطيس بدون ذكريات
الله يرحمه ويحسن اليه
ويبشبش الطوب المرصوص جوه منه
بشوية ميه وحفنة تراب
الله يرحمنا جميعاً
مدير قسم الادب و الشعر
علا السنجري
