٥ أسئله للمتزوجين والمقبلين علي الزواج تساعد علي نجاح العلاقه الزوجيه
نسبه كبيره من النساء يرددون أن كل الرجال عينهم زايغه وخائنين؟
نسبه كبيره من الرجال يعتقدون أن كل النساء نكديين وحالمين غير واقعيين؟
عزيزتي المرأه أرجوا الإجابه علي الأسئله الخمسه التاليه:-
س١: لما قررتي تتجوزي .. تزوجتي من رجل (ذكر) صح ؟ مش كيس جوافه؟ فهل ده معناه إنك لما وافقتي علي الزواج وسعيتي إليه كنتي موافقه علي إن عينه تزوغ أو إنه يخون ؟؟ !!
خليني أجاوب بالنيابه عنك … أكيد لأ …ولا كنتي بتمني نفسك إنك تغيريه ؟
س٢: هل قدرتي فعلا تغيريه؟
س٣: طيب إيه كانت خطتك؟
س٤: وليه فشلت؟
س٥: ولا كنتي عازمه إنك تحافظي علي نفسك كأجمل إمرأه في عينيه (وإنتي فعلا كنتي في نظره كده … بدليل زواجه منك أنتي دون سائر النساء) ؟ طيب وإيه اللي منعك؟ الحجج إياها الأولاد ! المسئوليه !
عزيزي الرجل أرجوا الإجابه علب الأسئله الخمسه التاليه:-
س١: وإنت بتتجوز كنت بتتجوز من فصيل النساء وإنت عارف مسبقا إنهم عاطفيين جدا والعاطفه بتحتاج إلي كلمات وأفعال مستمره غير متقطعه وإن توقفت عنها كنت تعلم جيدا أنها ستبدأ في القلق والتوتر وإحتمال إنها تتركك وكنت عارف أيضا أنها تعشق الرومانسيه حتي ولو لم تكن كذلك !! ومش بس كده .. ده إنت كمان كنت بتأكد لها انك ضليع وخبير رومانسيه وأنك قادر علي اغراقها بها !! هل كنت تسعد وتفرح عندما تطلبك ١٠ مرات في اليوم ولا كنت بتغضب وتتأفأف وتعتبرها شكاكه ؟ أو زنانه؟
س٢: كنت بتضحك علي نفسك ولا بجد كنت بتعرف تعمل كل ده وبعدين عطلت؟
س٣: هل مازلت تستطيع فعل كل ذلك ولكنك وجدت منها ما أغضبك منها فعاقبتها بتوقفك عن هذا العطاء النبيل؟
س٤: عندما كنت معها قبل الزواج، كان أمامك خيارات كثيره من شتي أنواع النساء ولكنك إخترتها هي وتمسكت بإتمام إرتباطك بها، يعني كانت عجباك ! طيب إيه اللي إتغير؟ هل علشان تخنت شويه ؟ هل بسبب إنشغالها عنك بعد الإنجاب؟ طيب هل صارحتها بكل ذلك وطلبت منها بلطف أن تراعي هذه المتغيرات وتخلي بالها ومش بس كده وساعدتها إنها تعود لما كان يعجبك؟؟
س٥: ولو كنت معتقد إنك فعلت كل ده وإنك فشلت!! طيب إنت معروف عنك بين ناسك .. إنك بتكره الفشل !! ليه في بيتك قبلت الفشل؟
الزواج مش مشروع فاشل …. إحنا الفشله
د/ مدحت عبدالهادي
