بريد القراء أعداد: هويدا صابر
دايما نسمع المثل الشهير كل أللي يعجبك وألبس أللي يعجب الناس ، ماهي فعلا الناس مش شايفاك بتاكل أيه لكن شايفاك وانت خارج حتي لو عندك طقم واحد المهم مكوي ونظيف ومظبوط وريحتك حلوة ، وأنت ماشي أفرد ظهرك وأبتسم ، ويااااه لوأخلاقك كمان تكون راقية وبتحترم نفسك والناس ، وقتها هتتفتحلك أبواب الخير والرزق كلها وأبواب عمرها ماكانت تخطرلك علي بال..
ودي مشكلة السائلة م ص:
أنا أنسة عندي 32 سنة من عيلة مستواها المادي والأجتماعي كبير وعلي قدر من الجمال وبهتم بظهري جدا والنضافة الشخصية ، عشقي الألوان أحب ألعب بيها في لبسي ومافيش حد بيشوفني غير لما يكلمني عن شياكتي وجرأتي في الالوان ، مش هطول عليكي يا أستاذة انا عايزة أعرف انا طبيعية ولا لأ في تصرفي دا ، أخوية عزم واحد صاحبه شاب عنده 34 سنة في بيتنا مره علي الغدا فاشافني وطلب الزواج مني ،
هو قليل الذوق في كلامه زي ما بيقولوا مافيش شكرا أو تعبتكم ودايما يقول الستات دول نمرده والست من دول مابتبطلش طلبات وزن ربنا يريحنا منهم دا غير أن مظهره مبهدل وهدومه مش نظيفه رغم أنه عنده أمه وأخواته البنات وأولوانه مش راكبه علي بعض ،
مافيش أي أهتمام بأبسط الأمور جاي من بره مش يدخل الحمام يغسل وشه وأيده مثلا قبل الأكل مافيش غسيل وتنظيف السنان دا مايعرفوش ولا مزيلات العرق ،
أللي عصبني أكتر لما الست أللي بتساعدنا في البيت أكتر من مره تقولي هو ليه يا أنسه صاحب أخوكي لما بيدخل الحمام مابينضفش وراه دا مين أللي تقبل تتجوزه هو ماتعلمش أن النظافه من الإيمان واسمه فلان بيه أنا كنت خلاص مش طايقاه وجبت أخري ،
قولتلهم الموضوع دا يتقفل نهائي ، هو أقل مننا أجتماعيا وماديا لكن وظيفتة ممتازة ومستقبله حلو جدا ، بعد رفضي مافيش حد مابيقوليش وافقي عليه وغيريه دا كفايه وظيفته حد لاقي جواز اليومين دول ، أنا مش طبيعيه ونمروده فعلا وبعدين الجواز دا قبول ونفس والأتنين مش موجودين.
—————–
السائلة الكريمة: أحب أقولك أنك طبيعية جدا وعندك حق في موقفك ورفضك لأنه صح ، ومشكلتك فكرتني بمشكلة شاب عنده 30سنة خطب بنت 26 سنة كل مايشوفها ميك أب كامل ولابسه لكن بيشم ريحة كريهة فقالها مره بذكاء أنا نسيت أستحمي النهارده قبل ما أجيلك أصل انا بستحمي كل جمعه يوم أجازتي قالتله أنا بتستحمي كل 10 أو 15 يوم وبالعافيه كمان أمه وابوه واخواته كان ردهم عليه سيبها أية أللي يغصبك البنات كتير وسابها ، للأسف أحنا مجتمع البعض فيه تفكيره ذكوري هيقبل من الشاب أللي أستحاله يقبله من البنت حتي لو كان أبسط حقوقها ، من شب علي شئ شاب علية دا عنده 34 سنة هيتغير أزاي ، عارفه لو كان الموضوع مقتصر علي لبسه فقط كان بقي هين لكن النظافة الشخصية زائد طريقة كلامه وتفكيره ولفظ الستات كلهم يدل علي انه شخص مش مرن ومش هيستقبل منك أي تعليق عليه ، وفي حاجات ماينفعش أنك تكلميه فيها هتقوليله أيه أكيد هتتحرجي تتكلمي فيها ، أللي ليكي نصيب فيه هتشوفيه وربنا ييسرلك كل الخير.
