الشغل مش عيب.

الشغل مش عيب.

بريد القراء أعداد : هويدا صابر 

الشغل مش عيب دي جمله بنسمعها لكن قليل جدا أللي بيقتنع بيها وينزل ويشتغل ويجري ورا أكل عيشه ومش مهم هيشتغل أيه ، المهم أنه يجيب القرش أللي يستره هو وعياله ويعلمهم ويوقفهم علي رجلهم ، وسبحان الله الناس أللي زي دي تقولك طول مافيه صحه هشتغل ومش همد ايدي لحد أبدا.

النهاردة مافيش مشكلة في قصة تستحق كل التقدير والأحترام من الأستاذه م ب:

أنا عندي 60 سنة ربة منزل كان عندي شغاله وسابتني ، وزي اي حد طبعا بدور وأللي تيجي مش ملتزمه وتتشرط وتاخد فلوس كتير وكمان أعملك جزء وباقي الشقه ليها حساب تاني وأنا محتاجه حد علي الأقل ينضف البيت ، واحده قريبتي جوزها جابلها رجل ينضف البيت مرتين في الأسبوع المهم في اليومين أللي جوزها موجود فيهم في البيت أجازه ، حاولت أقنع زوجي نجيبه وهو موجود ، زوجي وافق والرجل جه عندنا لأول مره ، لقيت رجل عنده 55 سنة مظهره بسيط جدا دخل البيت قالي شوفي عايزه أيه وانا هعمله زي ما انتي عايزه بالظبط ويارب ترضي عني ولو في مواعين او مكوه تحت أمرك ، عرضت عليه أكل رفض قالي كوباية شاي بس وهستأذنك هبقي أشرب سيجاره ، ولو حطيتي قدامه خروف أبدا ، لا وكمان يقولك أخد أللي فيه النصيب ويبوس الفلوس ويقول الحمدلله ، الساعه بقيت 6 بليل جوزي حلف عليه يتغدي وحطله الأكل أكل حاجه بسيطه وقال والله شبعت لو اقدر اكمل كنت كملت الحمدلله فضل ونعمه ، المهم زوجي أبتدي يتكلم معاه عايز يعرف هو بيشتغل الشغله دي ازاي وأشمعنا وكانت المفجأه أنه كان بيشتغل في السعوديه 4 سنين وعمل حجتين و25 عمره ورجع مصر أشتغل في المحاره لكن تعب منها وحصلت ليه أزمه ماليه وفي الأخر أشتغل في البيوت عشان لقمة العيش ويصرف علي بيته ومراته وعياله ويدخلوا الجامعه وحلم حياته يكون ابنه الكبير ظابط جيش ولا شرطه ، وقال الشغل مش عيب العيب الشتيمه في البلد والحقد علي الناس أللي معاها والشحاته والسرقه طول مافي صحه هشتغل وهتعب وأصرف علي بيتي لحد ماوصل عيالي لبرالأمان وانا أبوهم ودي مسؤليتي كأب..

أختي الكريمة:

أشكرك علي القصة أللي فيها معاني كتير والمفروض تكون حافز للكتير أن الشغل مش عيب فعلا ولا بيقل من الأنسان في شئ ، وصاحب القصه دا أنسان يستحق كل تقدير واحترام ويكفي كلمته أللي بتحمل كل معاني الأبوه وفيها تحمل للمسؤليه لما قالك دي مسؤليتي كأب ، دا مثال وقدوة تدرس للكتير مننا خصوصا للأباء أللي فيها صحه وتنزل زوجاتها وبناتها تخدم في البيوت وتتمرمط وياخد فلوسهم في الأخر أو يجوز بنته جوازه وهي لسه قاصر ياخد من وراها قرشين يطيروا علي المخدرات ويضيع حياة بنته كلها ولا تفرق معاه المهم ملي جيبه وأللي يرمي أولاده من غير مصاريف عشان خلافات مع الأم والأباء أللي بتذل زوجاتها وابنائها علي القرش أللي بيصرفوه عليهم ، وزودي كمان الشباب أللي علي القهوه ويقول هشتغل أيه هو فيه شغل وتريقة وأستهزاء رغم ان ممكن يلاقي شغل أدمي في أي مكان لكن بأجر ، هو أجر بسيط بس أسمه بيشتغل مش عاطل وممكن يجيب تمن مشاريب القهوه بدل مابياخدها من اهله ولوقعدة القهوه مأثره فيه أوي علي الأقل قاعد عليها من شقاه وعرقه ، لكن هنقول ايه سبحان الله النماذج دي لا تعليق عليها ، ربنا يطهر قلوبنا وعقولنا ونرتقي ونبطل نقلل من بعض ولما نلاقي أنسان بيجري علي اكل عيشه ندعمه ونقدره وننحي ليه أحتراما مش نقلل منه ونيجي عليه.