أللي يحضر العفريت يصرفه…
بريد القراء أعداد: هويدا صابر.
أللي يحضر العفريت يصرفه وأللي ميعرفش يصرفه يتحمل أذاه ، مثل مصري دايماً نسمعه في المواقف أللي الأنسان يدخل نفسه فيها بأندفاع وعدم تفكير وبعدها ميعرفش يتصرف أزاي ، لكن بعد أيه..؟
دي مشكلة السائله…….
السلام عليكم أنا عندى مشكله حرمانى الراحه ، لدرجه أنى مش عارفه أبدأ منين أنا من فتره نزلت مسجل مكالمات على تليفون جوزى ومن بعدها حسيت أنى عايشه مع حد معرفوش كدب كدب كدب على طول الخط وكلامه عنى وحش جدا مع أهله وواحد من صحابه بيقولهم أنه مش مرتاح وحياته معايا دمااااااار وهما للأسف معاه على الموجه لدرجه أنه فى فتره قال لصحبه أنه متجوز عرفى من ورايا وأنى ولا حاسه وبعدين أنا أتأكدت أنه كدب
ومن فتره قريبه حصلت مشكله وأهله قالولى كلمى أهلك وخرجوه من البيت عشان يتربي لأن الشقه بتاعتى وفى بيت أهلى وفعلا دا أللى حصل ورجع بعد 24يوم ، بعد محاولات منه مع أهلى وفى نفس الوقت كان دايماً يقول لأهله أنه كدا مرتاح وأن الجوازه دى دمرته وأنه عايز يتجوز تانى وألخ…..
طبعا كل ده عرفته لما رجع من تليفونه وهو بينكر أى كلمه وحشه قالها عليه وحتى أهله نكرو وحتى بعد مارجع كلم صاحبه وقالوا أنى رجعت بعد ما تحيلوا عليه وأن هو أصلا أتجوز فتره غيابه وأن محدش عارف وأن هو تعبان بينا لأنه مش قادر على المعاشرة الزوجية معانا أحنا الاتنين وطبعا كل ده كدب ، بس أنا دلوقتى مش عارفه أعمل أيه أواجهه بالمكالمات دى هخرب البيت وحتى لو قلت لأهلى هخرب البيت برضه أخواتى بيقولولى أتطلقى وعيشى أحسن من غيره ويمكن تتجوزى أحسن منه أنا مش هممنى نفسى أنا بفكر فى أولادى صغيرين ومحتاجين أبوهم ، وفى نفس الوقت بقول أنى غلط لما خالفت أمر ربنا وعملت كده وأن دى نتيجه غلطتى ولازم أتحملها ، بس برضه فى كل الحالات دي مش هيغير من شخصيته حاجه ، أعمل أيه أخرب بيتى ولا أصبر لعل الله يحدث بعد ذلك أمرا وحقى يرجعلى مع العلم أنه بيعاملنى كويس جدا وبيعمل كل حاجه تريحنى لأنى طبعا مش عارفه عنه حاجه ولما رجع قالى أنا رجعت عشاننك وبحبك وكل الكلام ده..
ربنا يباركلكم فيدونى وأنصحونى وأدعولى بالخير وأخرج من الدوامه دى علي خير وربنا يهديه من عنده عشان ولاده ……
واسسسسسفه جدا طولت عليكم.
_ _ _ _ _ _ _ _ _
السائلة الكريمه: في البدايه هتمسحي مسجل المكالمات أللي علي موبايل جوزك ، وتتعاملي معاه بعدها عادي جدااا كأنك مسمعتيش حاجه أصلا ولااازم تنسي كمان الكلام أللي قاله عليكي.
وفي تجربه عرضناها قبل كده في بريد القراء بعنوان لحظة غفله هبعتهالك ياريت تقريها كويس جدا وتتعلمي من صاحبة التجربه.
كده دا كان رأي هتتصرفي أزاي في مشكلتك ، لكن في حاجات لازم نتكلم فيها لو عايزه تعدي لبر الأمان بزوجك وأولادك ، نادراً يكون في زوجه معندهاش حب أستطلاع وستات كتير لو جتلهم الفرصه يتجسسوا علي أزواجهم مش هيترددوا بس قبل التجسس لو أكتشفتي شئ عندك الحكمه وحسن التصرف والقوه لمواجهة نفسك قدام المرايه هل أنا زوجه مثاليه ولا مقصره في حق نفسي وزوجي ، بالنسبه لزوجك هو مش خاين زوجك مريض نفيساً وموهوم ومش لاقي نفسه معاكي فيتخيل أنه كان ليه رد فعل قوي علي كل موقف مضايقه منك فأبتدي يشتكي منك ويقول أنه أتجوز عليكي عشان مش مرتاح معاكي ألخ.. ، أرجوكي أملي الفراغ أللي بيعاني منه جوزك وأحتويه وعيب جدا لما تحصل بينك وبينه مشكله يدخل فيها أهلك يكون نتيجتها الطرد من بيته قدام أولاده وبعد كده ترجعوه بحجة أن البيت بيتك وفي بيت أهلك ، يتعاشروا بعض بالمعروف يتسيبوا بعض بالمعروف ، هو حافظ علي ماء وجهه وقال أنكم أتحايلتوا عليه عشان يرجع بيته ، يعني تصرفاتك شجعته زياده علي الكذب ، عيدي حساباتك وأهتمي بيه وبنفسك وأستغلي أنه بيعاملك كويس وتعاملي معاه كرجل بكل أحترام وخليه يحس أنه رجل البيت مش ضيف فيه أي غلطه هتتطلع بره ، وربنا يهديكم لبعض ويصلح أحوالكم
