كتبت/ شاهيناز عبد اللطيف
كان ليه جارة ظروفها المعيشية صعبة شويه وجوزها يوم بيشتغل وعشرة لا…وكان لينا جارة تانيه بتتعمد دايما انها تحسسها بكده ..او ان ظروفهم علي ادها ..مثلا تعمل اكل وتروح تديها تاني يوم منه او البايت او اللي محدش عاوز ياكله…تبعتلها ملابس قديمة ….تتعمد وسط الكلام انها ترمي كلمة كده تجرح شعورها.لو مثلا حبت تدفع فلوس مشروبات او حاجه فخروجه سوا…وهي كانت تبتسم وتاخد الموضوع ببساطه..بالعكس لما كانت تعمل اكله حلوة ..تديها اول واحده..وفمرة قالتلي كلمه..بعد مامشيت..هي لو تعرف انا من بيت شكله ايه مش هاتعمل معايا كده..وفعلا الصدفه خليتني اعرف ان ابوها او عيلتها عامله..زي عمد فبلدتهم او كبار قريتهم بمعني اصح…ولما قولتلها..طب انتي ممكن ترفضي انك تاخدي الحاجه ..او ترفضي الاسلوب بشكل عام….قالتلي ..انا بافترض حسن نيتها ومش عاوزه اخسر جيرتها…كانت صغيرة فالسن عننا بس اديتني درس حلو..وتلف الايام ،ويجي صاحب البيت اللي احنا فيه يدبح ويخلي حارس العمارة يدور علي شقه شقه…ويدي السكان من الدبيحه،.قوم ايه كل السكان ياخدوها..ماعدا ..الجارة اللي بتتعمد تجرح صاحبتنا..وجوزها يثور ثورة جامده وشبه يحدف اللحمه فوش الحارس ..ويقوله قول لصاحب العمارة احنا مش شحاتين..!!..ومراته تزعل وتيجي تقول ..شوفتوا الراجل باعت لنا لحمه..هو فاكرنا ايه..؟؟
هي ماتعرفش انه وزع عالعمارة كلها وإن دي عادة عند بعض الناس كل مابيتمله موضوع او عاوزه يتم بيدبح ..زي ندر كده..وهما علشان جداد فالسكن مايعرفوش عاداتهم هنا…لكن هي وجوزها تخيلوا او تصوروا ان هو بيمن عليهم او عاوز يحسسهم بأنهم دون المستوي …طيب ايه المستفيد من القصه دي
☆::ان احساسك بالدونيه او بالرفعه نابع من جواكي انتي ،مش بمعامله الناس او نظرتهم ليكي..اعرف ناس من علية القوم وكل تصرفاتهم بتدل علي احساس بالنقص، وفالمقابل ،.اعرف اصحاب مهن او ظروف متواضعه جدا ومع ذلك الرقي اللي جواهم مايتوصفش
☆::الكاس اللي بتسقي منه غيرك هايجي فيوم وتدوقيه وتشربي منه ،زي ماتحبي تتعاملي .عاملي غيرك…
☆:: احنا بنخسر ناس كتير علشان اسباب اتفهه من كده بكتير..احنا ممكن نقطع صلة رحم..او نقطع عشرة عمر او جيرة لاسباب واهية لا تذكر..
