بريد القراء: أعداد هويدا صابر سرور
أن حد يظلمك دا شئ مش هين عند ربنا أبداً ، دا ربك أللي خلقك ورزقك ، أزاي ينسي أساءه أو ظلم ليك ، لو ربك نسي ماكانش دخل النار أمرأه حبست قطه ، وأنت يا بني أدم يا مظلوم حقك مش هيرجع ، لا دا راجع راجع أنت بس قول يارب من قلبك وبيقين وثقه في الله أنه معاك وهيراضيك وهيجبر بخاطرك ، صح ولا لا.
دي تجربة ص م.
أنا… عندي 28 سنه بكالوريوس تجاره ، أنا بأختصار أتخطبت وكنت بحب خطيبي دا جداً وكنا بنقول لبعض علي كل حاجه ونتكلم مع بعض بالساعات ومحصلش نصيب هو أللي بدأ يخلق مشاكل وفي الأخر بعتلنا أمه عشان تتكلم في فسخ الخطوبه وقتها حسيت بظلم كبير منه وأنه غدر بيه كنت بحسبن عليه كل ثانيه والدنيا أسودت في وشي ، وبقي كل همي أزاي أتخطب تاني ماهو مش معقول كل البنات قرايبي وأصحابي أتجوزوا وأنا لسه ، لحد ما شوفت أنسان تاني بهرني جداً شاب ووسيم جداً وجذاب في طريقة كلامه أتقدملي وأتخطبنا وحبيته أكتر من خطيبي الأول ، هو كان بيتحكم فيه بزياده ألبس أيه حتي اللقمه أللي باكلها كان بيعرفها وأنا كنت مبسوطه وأقول بيحبني وبيموت فيه ، وخلاص جهزنا كل حاجه وفاضل أننا نتجوز بعد شهر ونص ، أتصل أبوه فجأه يقولتا كل شئ قسمه ونصيب ، في أيه طيب أيه أللي حصل ، أبداً هو مش مستريح ، كرهت نفسي وبقيت بقول يعني مش هتجوز أنت ليه بتعمل فيه كده يارب أشمعنا أنا وسايبهم بعد ما ظلموني عايشين حياتهم أنا حقي ضاع ، وبصراحه أنا أصلاً ما كونتش مواظبه علي الصلاه ، وبعدها بقي كل تفكيري بجنون أزاي أتخطب والجوازه تكمل المره دي بقي حد من قرايبي جابلي عريس شوفته لقيته وافق عليه وافقت المهم أتخطب وأتجوز وخلاص ، وفعلا أتخطبنا وأهلي تتموا الجوازه في 3 شهور وساعدوا بحاجات كتير أوي في الجوازه عشان يخلصوا وتمت الجوازه وأنا دلوقتي حامل في 4 شهور ، ويشاء القدر أني أعرف أخبار خطيبي الأول بالصدفه وأنه خطب أكتر من مره لحد متجوز واحده بهدلته وكل يوم والتاني تكلم بوليس النجده ومحاضر ومحاكم ومش عارف لا هو ولا أمه يشوفوا أبنه وجاله السكر من الزعل ، وخطيبي التاني أتجوز ومراته متعاليه عليه ومبيعجبهاش حاجه ومش عايزه تخلف منه وطلبت منه الطلاق بعد 5 شهور جواز وأتجوزت تاني يوم العده ، أستغفرت ربنا وقتها وحمدته علي النعمه أللي أنا فيها وعلي حياتي ، وقولت لنفسي أزاي عقلك صورلك أن ربنا هينساكي وأن حقك ضاع خلاص ، عارفه أنا بعتلك النهارده وأنا أقسم بالله العلي العظيم كلي رضا عن حياتي وندم علي كل لحظه قولت فيها حقي ضاع ولو ما كونتش سمعت أللي وصل ليه خطيبي الأول والتاني كان ممكن أكمل حياتي بتفكيري دا ، لكن الحمد لله ربنا فوقني لأني كنت هخسر كتير.
_____________
الحمدلله رب العالمين ربنا كريم معاكي ولطيف بيكي ونجدك من شر وساوس نفسك والشيطان أللي كانت هتفسد عليكي كل جميل في حياتك ، لأن كنتي هتفضلي مشغوله بالماضي وأللي ظلموكي عايشين أزاي وحقك ياترا راجع ولا كده خلاص راح ، وأحتمال كبير أنك كنتي بتدوري وراهم وبتحاولي تعرفي أخبارهم بأي طريقه ، في وسط دا كله أستحاله هتحسي بجوزك وتهتمي بيه وببيتك ، لكن الحمد لله تجربتك دي رساله منك لكل بني أدم أتظلم أنه يحاول ينسي الماضي وأي ظلم أو غدر أو خيانه ليه ، أرمي ورا ضهرك وبص لقدام ولنفسك بكره بتاعك ، وحقك مستحيل يضيع ، حقك في أئمن أيد علي وجه الأرض ، أيد لا تغفل ولا تنام ، ربنا يصلحلك أحوالك مع نفسك وجوزك ويسعدكم ويرزقكم بالذريه الصالحه يارب وتعلميهم أن ليهم رب أسمه العدل ويرضوا بحياتهم ومايبصوش لغيرهم وأللي ليهم نصيب فيه هيشوفوه.
