ساعات بنقف في المرايا وبنتأمل ملامحنا . في ناس بتشوف نفسها جميله وبتكون معجبه جدا بملامحها . وناس بتشوف نفسها وحشه وبتقول في حد ممكن يبص للخلقه دي .
في ناس بتشوف نفسها شيطان وكل افعالها وتصرفتها غلط . وناس بتشوف نفسعها ملاك بيرفرف . كلها خير واحسان وطيبه.
بس الاكيد . كل الناس شايفه نفسها قلبها طيب . نزل بوسط كده على الفيس وقول اكبر عيب شايفه في نفسك . تلاقي الكل كاتب طيبة قلبي .
المشكله مش ف كده بس .
المشكله اننا بنوصل لمرحلة اننا مابقناش بنقدر نفرق بين الصح والغلط . كل واحد قبل ما يكذب او يخون او يسرق . بيكون محضر مبرراته . والمشكله الاكبر انه بيكون مقتنع بالمبررات دي .
مين صح ومين غلط .
تلاقي الست رفعه خمسين قضيه على جوزها وابو عيالها وسجناه ومضيعه مستقبله بالظلم لمجرد انه تجرأ وطلقها .
وتلاقي راجل عايش حياته ومقضيها وهو ظالم مراته وعياله ومطلع عينهم وحارمهم من كل حاجه .
وكل واحد ليه مبرراته . واكيد كل المبررات التي تؤدي الي الباطل فهي باطله . بس كل واحد مؤمن بالمبررات دي .
من كتر كذبنا على بعض وعلى نفسنا بقى عندنا شيزوفرينيا . بنكدب ولو حد كذب علينا بنعلقله المشانق . بنخون وبننجرح من الخيانه . بنسرق ونحبس اللي يسرقنا .
ياريت نحاول نكون منصفين وصادقين .
اللي ماتقبلوش على نفسك ماتقبلوش على غيرك . حكمه جميله اختفت من حياتنا . ياريت ترجع تاني .
واهي مجرد فضفضه .
إقرأ المزيد
