عزيز موسى
…………….
مين فينا عاش ف حياته
دايما مستقيم
زى الألف
ومجاش عليه وقت
شاف نفسه ف طريقه
بينحرف
او بص مرة فمراية
الحياة
بشوية حقيقه
لقى صورته عنه بتختلف
لقى شخص تانى
عايش بجسمه
وشايل إسمه
ولسه ما وصلش لهدف
صاحب كتير م الاوليا
صلى وصام
وعمل مقام
وطاف ف عيون البنات
وحب ترتيب الصدف
يمكن يكون
لف مرة سجارة
فوقت ضيقه
ونفخ همومه
ف الفضا
وضحك كتير
علشان يعدى
من طريق الصعب
وينول الشغف
من فينا
مكانش يحلم
بحياة الترف
زى ما الافلام والإعلانات
وحكايات الناس
اللى ملامحهم
من كتر نحت الزمن فيها
صبحت خزف
من فينا
مالمش مرة الظروف
ولو …..
بقت فلسانه
تعبير عن
كل اللى شافه من شظف
من فينا
ماحلمش بعدالة
وناس طيبه بتعيش حياتها
بدون قرف
بوطن جميييل
كما الاحلام
حاضن ولاده
ودستوره حق وعدل و وشرف
بيطبطب ع الفقير
وبينصف العالِم
وبيبنى للشهيد
على حدوده منارة
تهدى السائرين
مفهوش حزين
مفهوش سجين
مفهوش احلام بتتأجل
وقصه حب مقطوعة الخلف
من فينا
عاش
وما قلش آه
ورضى بنصيبه
وساب حموله
ف ركعتين
لله
انى مغلوب وانت الإله
والأمر ف بدايته ليك
وف منتهاه
رتب حياتى
بعلمك الواسع
واجبر الكسر ف وريدى
سكن الروح اللى محتاجه لطفك
وامنحنى
الرضا
يا عدل
يا احكم من لطف
مدير قسم الأدب و الشعر
علا السنجري
