بقلم
عزيز موسى
……………….
ويا غروب الشمس راجع
وف عيونى دموع ونار
مش حزين على حلم مات
او على هروب النهار
او شمس واخده حلم قلبى
ترميه ف بحر الانتظار
تاخد الحنين ويا النغم
وتسيب لقلبى الانكسار
ياساقيه الحلم القديم
كنا هنا حلمين صغار
متبعترين على ترعتك
نحلم سوى بلون الخضار
مستنيين حلم القلب يكبر
يكبر ويتحدى البوار
مستنيين ضحكه تملا نظرتين
تحيى قلب وتبنى دار
ياساقيه الحلم القديم
حزنى على حلم الصغار
………………….
بلون الشمس كان لونى
بلون الحنه ضفايرها
بلون الخضرة كان حلمى
وحلمى انى ماليش غيرها
انا العاشق انا الفارس
انا اللى من خوفها احررها
ارسم على عنيها فرحتى
واحزانها بأيدى أغيرها
كانت بتحلم بالمستحيل
واحلامها عندى تفسيرها
والحلم ف زمنا حلم ضايع
وانا المهيأ على الحلم اقدرها
انا المهيأ ارسمها للصغار فرحه
وف السما انشرها
انا المهيأ احييها من تانى
انا القادر على فك اسرارها
انا ياساقيتى بيدى
بنيت حيطان دارها
ورويت من دمعى ومن قلبى
نخيلها وازهارها
ياساقيه الحلم القديم
فين عنيها حلمى..ونهارها
…………………..
قالت لى منك بسمتى
وقلبى شقاها ولهيب نارها
قالت امانه قبل الرحيل
امانه عيونى تبقى تذكرها
قالت كمان
لما تنسانى ساقيتنا
ابقى فكرها
واكتب هناك حروف اسمى
على ترابها واشجارها
وبعترنى على الطريق
خلينى بسمه لكبارها وصغارها
خلينى حلم اكبر من ليالى الزيف
خلينى سمارها وخضارها
انا صفاء الميه والنيه
انا الزرعه ونوارها
امانه ياشاعر حزين
لوتتعبك سكتنا ومشوارها
خليك مع الحلم القديم
ولما ترجع لساقيتى تزورها
حتلقانى على دربك
عيون تحلم بفارس يغيرها
امانه ياشاعر حزين
تغنى لعيونى تانى اشعارها
وخد قصايدك من وحيى والهامى
ولو خيروك ابقى اختارها
وقبل الرحيل امانه ياشاعر
لو زهرتى دبلت ارويها وخضرها
وبنتك على اسمى سميها واحلامها كبرها
واحكيلها عن ساقيه الحلم القديم
عن شمس تاهت ف مداها ومدارها
احكيلها عن حلمين صغار
سوى حلموا يخطوا اسوارها
كانوا بيحلمو بالمستحيل
بس احلامهم
ماجاش
دورها
