بقلم / سهام خير بك
…. ….. ….
.هونيك
مطرح ماقلت لي بحبك
بعدا الأسامي عالشجرة
محفورة
وبعدا تواقيع عهد الوفا
والإخلاص
بالحبر والدمع ممهورة
بعدا طيور الحب
بتوقف على الأغصان
كل يوم بترندح لنا
أجمل الألحان
لبنت وصبي
عشقوا بعض
ومايوم
بعمر الهوى
خلوا العهد
ولا مرة
من مواعيد
الشوق والجوى
اخلفوا بالوعد
يشهد عليهم
رب هالأكوان
الحب اللي بقلبهم
ماعرفو قبلهم انسان
شو صار
حتى تفارقوا
وتزاعلوا
مين اللي لفق على التاني
الكذب
مين اللي عملهم كل واحد
بحزب
ويمشي لحالو بدرب
من بعد ماكانت
درب الغرام
يمشوه تنيناتن سوا
وبشوق ووله
يلاقو بعضن
كل ماجن الهوى
تخمين اللي فرقن
عن بعض
قلوب مليانة
حقد وبغض
مش قادرة تشوف
البراءة عالأرض
متواعدة مع الهوى
فبتزرع بين الأحبة
الفراق والنوى.
