بقلم خالد وجيه
حسيت بالزلزال امبارح
كان والله عليه حتة هزة
مش عارف ليه انا صابح
مشوش و مشاعري مهتزة
حاسس ان الدنيا غريبة
و الناس أغرب هما كمان
من كان عامل زي مصيبة
أصبح في التو إنسان
اللي بياكل في حقوق غيره
تاب و اناب و اداله حقه
و بدال ما بيلعن و بيشتم
الكلمة الحلوة ملت بقه
و اللي بيزوغ من شغله
بقى شغاااال زي النحلة
بقى يخلص و يحلل أجره
و حياته اكيد تصبح أحلى
و اللي بتجيب سيرة غيرها
خليتها خلاص عايشة في حالها
و اللي رفعالنا في مناخيرها
تواضعت للناس قبل أجلها
و اللي بيطفف في ميزان
و آخرته وقعت من حساباته
بقى يوزن بالحق عشان
في حساب جايله بعد مماته
و اللي بيعذب في مراته
و فاكرها خدامة و جارية
الذوق و الحنية خلاص
بقى هما أخلاقه السارية
يمكن الهزة الأرضية
خلتني أتخيل و أحلم
ان تكون أيامنا الجاية
نكون فيها انقى و أرحم
اتاريني نايم و بأشخر
مش حاسس حتى بالدنيا
قايم على شغلي متأخر
لازم ألحق ده مفيش ولا ثانية
و اللي اتخيلته في أحلامي
ما لقيت منه حاجة حاصلة
مضطر اسيبكم دلوقتي
يمكن ألحق أي مواصلة
