لانشون الدجاج الاقتصادي
من مطبخ نيفين منصور
طبعا كلنا بنعاني مع اولادنا و مع انفسنا في مقاومة حبنا و عشقنا للحوم المصنعة و كتير مننا قاطعها تماما … لكن في مطبخ سحر الحياة قررنا نعملك كل حاجة في البيت عشان تاكلي وتستمتعي انت و اولادك و انت مطمئنة تماما
مقدمة من / نيفين منصور
مدة التحضير / 20 دقيقة
مدة الطهي / 90 دقيقة
المقادير :
نصف كيلو صدور فراخ مخلية
6 بيضات كبيرة
4 قطع جبن مثلثات
2 مكعب مرقة دجاج
5 م ك دقيق
2 م ك نشا
2 م ص توم مفروم
1 م ص فلفل ابيض
2 م ك بصل بودر
1 م ص بابريكا ( استغنيت عنها عشان يفضل ابيض )
1 م ص توم بودر
نصف م ص زنجبيل بودر
كوب زيت
1 م ص ملح
لسلق اللانشون :
ماء
ورق لاورا
حبهان صحيح
ملح
فلفل
الطريقة :
– في الخلاط او الفود بروسيسور حطي البيض و التوابل و الجبن و مرقة الدجاج
– ننزل بقطع الفيليه بالتدريج عليهمثم نضيف النشا و الدقيق
– حتى نحصل على قوام كريمي بالظبط زي قوام الجبن الكاسات
– نيجي للتشكيل هقولكم على خطوة حلوة بديلة للف بالاسترتش بلاستيك
– هاتي زجاجة مياة معدنية فاضية و قصي الرقبة بحيث تبقى كلها مستوية اسطوانية يعني
– حطي فيها خليط اللانشون و غطيها بنايلون و دخليها الفريزر ليلة كاملة
– تاني يوم طلعيها 5 دقائق و قصي الزجاجة بالمقص من حول اللانشون
– خدي اسطوانة اللانشون و لفيها مرتين في بلاستيك سترتش و مرتين فويل
– اغلي المية و فيها الحبهان و اللورا و الملح و الفلفل
– ونزلي اسطوانة اللانشون فيها و هدّي النار عليها ساعة و نصف و كل شوية اقلبي الاسطوانة عشان نتاكد انها مستوية بشكل متساوي من كل الجهات
– شيليها من المية و سيبيها تبرد و دخليها التلاجة ليلة كاملة
– طلعيها من التلاجة و فكي البلاستيك و الفويل و قطعيها شرائح رقيقة بسكين حامية جدااااااااااااا
و الف هنا على قلوبكم يارب
مدير مطبخ سحر الحياة / نيفين منصور
