أمير وشاهير ولبس العيد حكايات ماما زوزو

كان يا ما كان يا سعد يا اكرام ما يحلى الكلام الا بذكر النبى عليه الصلاة والسلام .. كان فيه زمان زمان ولد جميل اسمه امير .. وكمان كان فيه ولد شرير اسمه شاهير .. ايه اللى حصل ؟؟؟؟ تعالوا نشوف …….

أمير ولد جميل لكن كان فقير .. وكان صديقه شاهير ولد شرير .. وفى يوم من الايام .. كان العيد قريب مش بعيد .. وكل الاولاد بيشتروا كل جديد ..

لكن امير الجميل .. كان فقير .. ومعندوش فلوس يجيب لبس جديد .. وفى يوم العيد جاله شاهير يزوره .. ويفرجه على كل هدومه الجديدة .. وفى ثانية .. عينه نزلت على هدوم امير .. لقاها قديمة .. وكمان شوزه مقطوع ..

قاله ايه دا يا امير !! انت ازاى تعيد بهدوم قديمة !! وشوز مقطوع !!.. وقعد قدامه متكبر .. وزعل منه امير ..

لكن امير مسك نفسه .. وقاله انا هدومى جميلة .. ومش مقطوعة .. ولا شوزى مقطوع .. هدومى حلوة وجميلة وشوزى كمان جميل ..

لكن شاهير الشرير .. بصله نظرة كبر .. وقاله .. وانا همشى ومش هصاحبك تانى .. مش بصاحب حد فقير .. وساب امير ومشى ..

وبعدها امير بكى .. ولربه اشتكى .. وقال ياربى اعمل ايه ؟؟!! صحيح انا فقير .. لكن شاطر .. ومخى كبير ..

وفجأة فكر .. وبسرعة قرر .. يشتغل جنب دراسته ويجتهد .. ويكون رجل اعمال كبير ..

وفعلا .. اجتهد .. وذاكر .. واشتغل .. وكسب فلوس كتير .. واصبح عنده مصانع ملابس واحذية كبيرة .. وبيتصدق كمان على كل الغلابة اللى معندهمش فلوس يجيبوا لبس جديد فى العيد..

وفى يوم من الايام .. اتقابل مع صديقه الشرير شاهير .. لكن كانت حالة شهير كرب .. افتقر وخسر كل فلوسه اللى ورثها عن والده .. وبسرعة فكر امير الجميل وقاله .. انا هساعدك واشغلك واجيبلك كل جديد .. لأنك صديقى الوحيد اللى كان السبب بعد ربنا سبحانه وتعالى فى كل الخير اللى انا فيه ..

لأن لولا انك سيبتنى .. وبهدومى القديمة عايرتنى .. مكنتش حولت النار اللى جوايا لوقود .. امشى بيه لقدام وانجح واكبر وابقى النهاردة من اهم رجال الاعمال .

وتوتة توتة خلصت الحدوتة

رودي وعمر

حكمة ملكة