القلوب الطيبة

عارفين القلوب الطيبة؟
اللي قلبهم طيب وما يعرفوش لا لف ولا دوران، حتى لما بيكدبوا لأي سبب بيرتبكم ويتلخبطوا وكلامهم بيبقى مش شبه بعضه وفي الآخر يعترفوا.
الناس اللي أحلامهم بسيطة وطموحاتهم أبسط وتكاد تكون مش موجودة.
دي ناس بسيطة في تفكيرها بس قلبها معقد جدا من فرط الحب والحنان والتسامح والايثار اللي يخليك تفكر كتير اوي وتقول لنفسك… هما ازاي كده؟
لما بيكلمونا بنكون احنا كل اهتمامهم، عينهم مش بتنزل من علينا وإحنا في المقابل بنكون مش منتبهين ليهم اصلا وعينينا مش بتيجي في عينيهم برغم انهم يتمنوا نظرة رضا مننا.
عندهم افراط في كل حاجه حلوة
حب بزيادة، حنية بزيادة، زوق بزيادة، إيثار وبييجوا على نفسهم مع اللي بيحبوهم بزيادة. بيحترموا اللي بيحبوهم وبيدفعوهم للأمام.
عطائهم مستمر حتى وانا مش شايفينهم ولا حاسينهم.
عطاءهم مستمر واحنا بنقسو عليهم بكلامنا أو تصرفاتنا.
عطائهم مستمر وإحنا كمان بنجرحهم وبنلومهم على أحلامهم البسيطة وبنجرحهم لقلة تفكيرهم وقلة طموحهم ، بس نسينا إن قلبهم الكبير وحبهم الكبير وطيبتهم أهم بكتير من الأحلام والطموح.
نسينا علشان اشبعونا حب واهتمام ورعاية وبعد ما شبعنا روحنا نبحث على الناقص فيهم ونسينا إن راحة قلوبنا أهم بكتير من راحة عقولنا.
مش لازم نخسرهم علشان نحس اد إيه هما غاليين.
مش لازم نستبدلهم بالأسوأ علشان نعرف قيمتهم، لأن ساعتها ده هايبقى أكبر جرح ليهم، ولو مشيوا مش ممكن يرجعولنا تاني.
مش لازم الموت ياخدهم مننا.
القلوب الطيبه دي عايشة بس علشان تعطي
أصحاب القلوب الطيبة استقرارنا النفسي هايكون مشوه لو بعدنا عنهم وما حسيناش بأهمية وجودهم قبل فوات الأوان… لأنهم رمانة ميزان حياتنا، اللي لو فُقِدت…. حياتنا هاتختل