بقلم/ (شرين سعد أحمد)
شاعرة جنوب الوادي
يا دنيا غيري حالك
بلاش تلطيش
شيليني بسرعة من بالك
سيبيني أعيش
،،،،،،،،،،،،
خديلي حقي من عينك
دا أنا حالي صبح معدوم
أمانة ربنا يعينك
أنام بالليل أقوم مهموم
،،،،،،،،،،،،،،،،،،،
بتجري ورايا مسعورة
وأنا اللي واخدها زحافي
بتتعايقي ياغندورة
وأنا واقف هنا حافي
،،،،،،،،،،،،،،،،،
وراسمة الفرح للغالب
وأنا مغلوب على أمري
وغلبي كمان مهوش عاجب
ولا عاجبك أنين صبري
،،،،،،،،،،،،،،،،
ولو أدفن أنا راسي
في رمل الكد مش نافع
شقاي حابس أنفاسي
وبردو شقاي مش شافع
،،،،،،،،،،،،،،،،،،
قطعت العمر بسناني
وقلت بلاها م السكين
لقيتها بعند وجعاني
تقلي تعبت يا مسكين
،،،،،،،،،،،،،،،،،،
فقلت لنفسي راح اجيلك
واترجى كما المسجون
وعن حالي أنا اشكيلك
وبالشكوى نواحي يهون
،،،،،،،،،،،،،،،،،
فقومي يلا راضيني
وفكيها كده معايا
وتوب السعد اكسيني
دا استحملت بكفاية
