قال إيه ” بنشترى راجل” !!!!
بقلم مياده عابدين
كانت البداية، لما راح (محسن) يتقدم ل (أمينة) بنت الأستاذ سيد، ودى مكنتش المرة الأخيرة اللى بيتقدم فيها لبنت الحلال، ده اتقدم بعدها لعبير وسناء وريهام وسهام ووفاء وهناء وسلمى وغيرهم كتير …. وكان كل مرة بيترفض لدرجة إنه خاف على نفسه -ياحبة عينى- من كثر اللى بيحصله دة ليعنس -مش لعيب فيه لاسمح الله- دة حتى شاب وسيم، طول بعرض بأدب وأخلاق، و كمان بيشتغل فى وظيفة حكومية يعنى كسيب وميتعايبش … دة حتى الحاجه والدته علطول تقوله “انت ألف واحدة تتمناك” .
بس للأسف كان كل مرة من الثلاثين دول إللى بيروح يطلب فيها إيد بنت شاف إنها مناسبة له ولظروفه وعاوز يكمل بيها نص دينه بقى ويستقر، كانت الجوازة بتبوظ بسبب جملة فى الظاهر يبان معناها كويس وابن ناس، لكن فى الحقيقه هى سبب إنتهاء جوازات كتير …
الجملة دى: ” إحنا بنشترى راجل يابنى” !!!!
يعنى إيه “بنشترى راجل” …. كان كله مرة يترفض فيها محسن بسبب: الثلاجه والغسالة والشبكة، يقعد يفكر ويقول لنفسه: “إحنا ليه خلينا الراجل سلعة هنشتريها ولازم نبقي كسبانين من وراه .. وفى المقابل هنبيع له السلعة التانية إللى لازم هى وأهلها يكسبوا بردو من البيعة دى … إحنا ليه خلينا الموضوع عبارة عن صفقه كل واحد فينا بيفكر هيكسب منها إيه ؟!! .. علشان كدا تلاقى الراجل اللى هيشتروه دة رايح يتقدم للبنت على سنجة عشرة، و لابس الحتة إللى ع الحبل، ومسرّح شعره بالجِل و واخد فى إيده علبة الجاتوه أو الشيكولاتة علشان يملى العين من أول نظرة … ماهو حابب يكسب الجوله الأولى علشان المظاهر بقت من الحاجات المهمة قوى دلوقتي …… “
كل مرة يدخل محسن بيت ربة الصون والعفاف -العروسة الجميلة إللى عليها العين- ويتقدم لأهلها ويقول الجملة الشهيرة: “عمى أنا طالب إيد بنت حضرتك .. عاوز أعرف إيه طلباتكم؟!!” ، دة بعد مايكون حصل قبول مبدئي من الأهل والعروسة لمحسن طبعاً يرد أبو العروسة متسرعاً: “طلبات ايه يابنى !!! عيب، أحنا بنشترى راجل …”
وبكده بتبقى انتهت الجولة الاولى، وحصل لمحسن القبول المبدئي للشكل والوظيفة والعيلة، وندخل بقى فى الجولة الأهم وهى تسليم البضاعة لمحسن … ما هو أهل العروسة اشتروه لازم محسن ياخد هو كمان البضاعة اللى داخل يشتريها ….. بس للأسف الموضوع مبيتمش بسهولة و يبدأوا الأهل فى عرض مميزات البضاعة إللي محسن هيشتريها وأشهر جمل الترويج للبضاعة: “إنت عارف يابنى إن بنتنا تساوى تقلها دهب – وحسب هى ووزنها بقى ..الله يكون فى عونك يامحسن!!!-” …
“فى الأول كدة إحنا عاوزين مهر مش أقل من اللى اتدفع فى بنت عمها -طيب هو محسن ماله ومال اللى اتدفع فى بنت عمها- !!!! ” …
“ثانيا يا ابنى إحنا عاوزين شقة تمليك ولازم تكون جنبنا هنا بنتنا مش هتسكن بعيد عننا” …
“ثالثا احنا عاوزين فرش أربع أوض .. ومتنساش أوضة الأطفال .. والنيش والسفرة دول أهم حاجة … والأجهزة الكهربائية وشاشة إل سي دي ، نيجي بقى للفرح !!! …..”
ودى بتكون أخر جمله فى الاتفاق ,لأن فى الوقت دة محسن بيكون رد على أبو البضاعة أقصد (أبو العروسة) إن مش هيكون فيه فرح لإنه معندوش إمكانية لكل الطلبات دى ، هو أكيد مش معاه المصباح السحرى علشان يجيب كل الطلبات دى … وبتنتهى الجوازة زى كل مرة بإنها مبتمش !!!
بعد ما كانت البداية: “إحنا بنشترى راجل يا ابنى”، بتكون النهاية: “إحنا معندناش بنات للجواز يا أستاذ” ….
هو ليه الأهل مبيفكروش فى حاجات تانية أهم من الفرش والنيش والنجف والشبكة والمهر؟!! … ليه مابيفكروش فى الشخص إللي هيسعد البنت ويصونها؟!! .. مبيفكروش ليه فى اللى هيخليها مبسوطة وسعيدة ومطمنة؟!!
مبيفكروش ولو للحظة فى إن بنتهم بتبقى عاوزة الشخص إللي بيرفضوه علشان نجفة دهةولا لأ ؟!! …
مبيفكروش ليه فى راجل صالح يشيلها فى عيونه يخاف عليها من الهوا الطاير .. يحبها بجد .. يعبر عن حبه دة بالأفعال مش بالشبكة والعربية والبهرجة ؟!!
الشبكة الغالية مش هى إللي هتحمى بنتك ياحاج لو جوزها حب يهينها .. العربية الفخمة مش هى اللى هتفرّح قلبها لو قرر فى يوم يضربها أو يشتمها ….
الفلوس مش هى إللي هتحسسها بالأمان مع إللي هيشيل البضاعة.
لما يجيلك راجل إمكانياته على قده وداخل البيت من بابه، وحابب بنتك ومستعد يصونها وهى كمان مرتاحة له …. متوقفش الجوازة علشان كلام فارغ كله ممكن يزول فى ثانية
ياريت ياحاج إنت والحاجة لما تيجوا تختاروا لبناتكم اختاروا الأخلاق .. اختاروا إللي يصون .. إللي يحب بجد .. إللي يتمنالها الرضى ترضى ……
وعلّموا بناتكم كمان (القناعة) …. قولها لما تيجي تختاري اختاري إللي يحترمك مش اللى يعتبرك سلعة جاي يشتريها بفلوسه ……
الجواز مش صفقة ولامؤسسة داخلين نشوف مين إللي هيكسب فيها وهنزود أرباحها إزاى كل سنة ….
الجواز سكن و مودة و استقرار و حب و تفاهم وأمان ….
ياحاج كنوز الدنيا كلها مش هتحسس بنتك بالأمان لو الراجل إللي معاها مش أمين عليها ….
عزيزى الحاج المصرى لما يجيلك عريس يطلب إيد ربة الصون والعفاف بنتك .. أبوس إيدك متجيبش سيرة البيع والشراء فى القعدة …
خلّي الجوازة تتم على خير و بالرفاء و البنين إن شاء الله
